;) السلام عليكم جميعا عندي اجتماع نسائي الاسبوع المقبل واتفقنا في الاجتماع السابق ان كل واحده فينا تطبخ من اكل بلدها و طبعا الحيره غلبتني لاني لا اعرف اي اكثر اكله مشهوره في اليمن زوجي من باب المزاح قال الرز والصانونه واني افكر بالزربيان بس لازم اطبخه من صبح الله ههههه اي واحده عنده فكره لاكله ممكن اطبخها في ذاك اليوم. لا وايش كمان عايزين الزي الشعبي اني اعتذرت لاني لا استطيع الجو باردبس بعدين سألت نفسي ايش الزي لنا احنا في عدن ,وووووومعقوله يكون الدرع شي نظهر فيه على البشر في صنعاء الزنه لكن احنا العدنيات ايش الزي الشعبي اللي ممكن نظهر فيه للعالم,,, مش معقوله يكون الجينز:d

يا هلا با انوف ذكرتيني بعدن واهل عدن حتى حمى عدن والرشح اشتقت له ياربي متى ارجع لها بس بالنسبة للاكل تقدرين تسوين باجية او سمبوسة او فلوري او خمير او خبز ملوح او عشر او بليلة او ربيس السمك او لحوح او مطبق البيض وتقدري تجمعي ثنتين مع بعض والا اقول لش سوي بطاط ابو حمر يايييييييييي يجنن سوي الاحمر او الاخضر زي حق ريمي اما البس وش فيها البسي الدرع ( ويل اصلي جبوتي رقم واحد انتبهي تضحكي عليهم ههههههههه) والا البسي بيور سلك المهم الي تلبسيه سوي تحتة شلحة من لونه ومقرمة من نفس الون واكسسوار متطابق مع حزام ياربي جننننننننان اذا عندك حزام فضة البسي الاكسسوار معة من الفضة وابهيرهم على فكره انا مره عملتها وكانو في عراقيات وفلسطينيات انجنو على لبسنا وعجبهم كثير موفقة ان شاء الله

الله عليك يا يافعيه شهيتيني بالبطاط حق ريمي والبسابيس .:p اما بالنسبه للاكل اتفقنا تكون وجبه اساسيه مش حق العصاري زي عدن لكن للان قررت البرته تعرفيها او لا لاكن الوجبه الاساسيه والله محتاره . لكن بربك البس درع هنا واني لازلت البس الجاكيت حق البرد الله يسامحك عاوزاني اموت من البرد. طبعا لما يشوفوا الدرع اكيد بيعجبهم لانهم اجنبيات و ما يصدقوا يشوفوا حاجه غريبه لكني لا البسه هنا او حتى في اليمن الا للعرسان فقط. شكرا حبيبتي على الافكار ولو ما كانش الخبز ياخذ وقت كنت طبخته وكمان مع الحمل في الصباح يدوب افطر البنات علشان ارتاح شويه.

هههههههههههههههه سلامتك من البرد بس وين عايشين انا في امريكا ومع هذا البرد خف شوي والثلوج ذابت اذا على الدرع عادي البسية وبعدين البسي فوقه عباية وبعدين الجاكيت لا تكوني كسولة ولا تتعذرين لي بالحمل اما عن الاكل مادام انكم اتفقتو على اكلة رسمية اذا مالك حق اكيد اعملي رز زربيان وجنبة هلوى (((ياربي اكيد تتذكرينه وخذيلهم يشربون بعدة شراب خخخخخخخخخ بس لازم يكون الجو حار ولعي الهيت على الاخر عشان الرشح ينزل خخخخخخخخ))) وتقدري تسوي كمان فتة خبز وتمر اما على الزربيان ادري انه صعب تقومين بدري عشان تسوينه عشان كذا معي لش طريقه سوي كل شيى من اليوم الاول لغاية ما تنجح معك اللحمة ولا تخلين لك غير تطبخين الرز نص طبخه وتكبسية (( يعني اجلي الرز فقط لليوم الثاني )) وحطي اللحمة مع خلطتها والبطاط وكل شيى بعد ما تغلقينه تمام وحطية في الثلاجة وفي اليوم الثاني طلعيها وسخنيها شوي وسوي الرز وبعدين اكبسيه عادي مثل الطريقة المعتاده وعلى بال ما يجهز تروحي تجهزي البنات وهذا الطريقة ما با تاخذ منك نص ساعة بالكثير وعن تجربة وحتى طعم اللحم ما يتغير وطعم الزربيان يكون جنان واللحمة خامرة من الصوص الي حوليها لكن اذا كان دجاج فهو يتغير طعمة

والله يا ام نوف بما انش عدنية ماراح افيدش كثير لاني من الشمال بس ماشائ الله عليها الاخت فتاه يافعية ما قصرت .. بس ها بعد الاجتماع ودنا نعرف ايش قالوا عن أكلنا وزينا الشعبي:) بانتظاااااااااار

:p الله عليك يا يافعيه تذكريني بالهلوه واني مااعرفش اسويها الله يسامحك انتي ناسيه اني واحم هههه. على العموم اني عايشه فوقك بالظبط يعني احنا جيران بس البرد خف شويه لكن الرياح تقوم بالواجب على العموم اكيد بسوي اما زربيان دجاج علشان ينجح بسرعه او صياديه طبعا بدون بسابيس علشان وجوههم ما تنفجر من الحر:p بالنسبه للزي ماعنديش عبايه و لا درع كمان بس هل فعلا هذا هو زينا في عدن و على فكره لما تيجي عندنا بسوي للك بطاط زي حق ريمي ولا يهمك وكمان بسباس زي حق ناقر الخشب تذكريه هههههه بس ما تطلبيش الاسعاف بعدها خخخخخخ:p شكرا يا غزال على مرورك وعى فكره اني نص جنوبي ونص شمالي وكلي يمنيه بنت يمنيبس ولدت في عدن وعشت فيه و درست حتى الجامعه و بعدين هات يا ترحال بس ولا يهمك اني حصور الاطباق الموجوده و اقول ايش راي في كل واحد:p lts gona be fun, just like being in international resturant

اني مع كلام الاخت فتاة يافعيه ....... البسي درع و اطبخي زربيان صدقيني راح يتفاجؤون لان الزربيان اكله تعجب كل الناس ....... وخبرينا على النتائج يام نوف

ولا يهمك يالغاليه اذا بدك طريقة الهلوى اعطيك اياها لانها سهله مررررررررره عشان تجيبي لنا نواف حلييييييييييوة الله يعيننا عليش ذليتينا بالحمل والوحام ههههههههههه

ياجمال حوارك وكلامكم له مذاق رائع ... كل شيء من عدن روووووعه اللبس والأكل واللهجة .. أستمروا خواتي أتابع كلامكم وحواركم وأذكروا كل شيء جميل بعدن .. وأي شيء أني تحت أمركم لكم كل الود

المشاركة الأصلية كتبت بواسطة فتاه يافعيه ولا يهمك يالغاليه اذا بدك طريقة الهلوى اعطيك اياها لانها سهله مررررررررره عشان تجيبي لنا نواف حلييييييييييوة الله يعيننا عليش ذليتينا بالحمل والوحام ههههههههههه ياريت أختي فتاة يافعية تعطي لنا طريقة عمل الهلوى وكمان تخبرينا قليل عن تقاليد أهل يافع من اللبس والأكل بالذات في المناسبات .. السموحه راح نتعبك معانا ... لكن مثل هذه الأشياء تعتبر تراث على الجميع معرفته دمتِ بخير