بدع الشيخ محمد بن راشد وجواب خلف بن هذال

الكاتب : أبو صالح   المشاهدات : 883   الردود : 1    ‏2001-09-01
      مشاركة رقم : 1    ‏2001-09-01
  1. أبو صالح

    أبو صالح مشرف سابق

    التسجيل :
    ‏2001-06-17
    المشاركات:
    685
    الإعجاب :
    0
    يا قلب



    اهداء إلى الأخ العزيز الشاعر خلف بن هذّال العتيبي

    يا قلب يا الّلي مولعٍ بالمودّهْ *** يا ليت عندي قلب خالي ولا أنت
    كم من غزالٍٍ يخجل البدر خَدّهْ *** لي قرَّبْ إحْساس المشاعرْ تمكّنْت
    "دخلت في "الإحسا" و"سوده" و "جدّهْ" *** وباْرض "الريّاض" أمسيت فيها وعَنْوَنْت
    عنوان ما يخْفِيْهْ جَزْره ومَدّهْ *** مشهور للّي يبغي الوصل بيّنْت
    أدخل خمايل وَرْدْهُمْ واسْتمِدّهْ *** ويا كمّ من وَرْدٍ قَطفْتهْ تمعّنْت
    غِصْت البحور وصَادفْ الحيل شِدّه *** على المخاوف والخطَرْ ما تهَاونْت
    عَدّيتْ طيري لين حَزَّة مهَدّهْ *** عليه باسْياج المواثيق صوَّنْت
    جَسْرٍ ولو كثرْ العطا ما يسِدّهْ *** ولا فالْ عنْه اللي على الفال عيّنْت
    شفْتْ الغروس وبينها كلّ جعدهْ *** تنثِرْ جدايلها وانا ما تبيْنْت
    غرايسٍ صعْبات وتثير جهدهْ *** ما يعطنْ الطَّاعهْ ولو أنتْ تزيّنْت
    وِوْرُوْدْ حُمْرٍ كلّما شفْت وَرْدهْ *** من حسنها بنْت ولا هيهْ بالبنْت
    وبابٍ وسيعٍ ما حَد رامْ سَدّهْ *** للجودْ واهْل الجود أنْصاهْ لي حِنْت
    حريم ورْجالْ الكَرَمْ ما تحِدّهْ *** فيهم ومن جاهم فلا يشتكي عنْت
    تبذل عِشاها بالكَرَمْ مسْتعدّهْ *** بالطّيْب وأهل الطْيْبْ والخير عيّنْت
    خيلٍ بليّا سْرُوجْها والأشِدّهْ *** ظْهُورْها صلْفاتْ لو كنت من كنْت
    يا كمّ نَجْديٍّ ومعزول قدّه *** له بالمحبّهْ والمشاعر تمننْت
    لكن صادفني بصدّهْ وخدّه *** وانا بصدّه مغرمْ الشوق وِمْحنْت
    متعذِّبْ بحبّهْ وفي (نجد) عندهْ *** قلبي وليت انّي بوصْله تطمّنْت
    أضرب مثل واللّي م الأمثال وِرْده *** خبر وتجاريبٍ لها دوم ثمّنْت
    الضَّبْع يبقى ضبعْ لو طار جلده *** والسِّبْع دومه سبْع ما يْخوْن لوخنت
    والسِّبعْ له عَ خاين العهد رَدّهْ *** ويْْصُوْنكْ ان كانكْ...على عهد الوفا صِنْت
    وذِيْب سرى يومٍ شكى الخلّ بعْدهْ *** مْغَزرٍ نابه وله بالوفا عِنْت
    بَيَّحْتْ له سدّي ولي باحْ سدّه *** وسألْتْ عن معنى له بْعرْف دَوَّنْت
    عن صَاحبْ بْوجهين ضدٍّ وضدّهْ *** فيه الشِّرا والبيع إن هانْ بك هنْت
    مْسوَدٍ وجْهه ولكنْ تودّهْ *** على سوادْ الوجهْ لي فيه ماشِنْت
    معنى بعثته للّذي نسْتعدّه *** إلى (خَلَفْ) مِ اللي لعرفه تطمنت
    نَهدي لـ"بن هَذّال" معنى يْردّهْ *** يا من لمعنَانا بفهْمِهْ تعَاوَنْت
    لي ما تحلّهْ أنت ما يْحلّ عقْدهْ *** وعلى الّذي تَدْعِيْه يا كمّ أمّنْت
     
  2.   مشاركة رقم : 2    ‏2001-09-01
  3. أبو صالح

    أبو صالح مشرف سابق

    التسجيل :
    ‏2001-06-17
    المشاركات:
    685
    الإعجاب :
    0
    رد: خلف بن هذال العتيبي

    سلطــــان عـــــز

    آحِدّ جفني وِيْحداني واحِدّه *** عن السَّهَر واطعت له غصب واذعَنْت
    لابِدّ ما تسهَر عيوني لابدّه *** ولْيا سمعت ملحِّنْ الورق لَحَّنْت
    تحت السما واثني ذراعي وامِدّه *** أرعى نجوم مْسَيِّر الكون وامنت
    أبني خيالي من خيالي واهِدّه *** ياما خلطت بدمع عيني وْلَبَّنْت
    القلب بين اخْذِه وهاته وْوَدّه*** من ذا الزمان ومجرياته تجنَّنت!
    عندي خبر بامسه ويومه…وْغَدّه *** ما اعْلَمْ عَنِهْ عن ما خفى ما تكهَّنت
    للعِرْف تجريبه وللثوب جِدّه *** تجاربٍ مَرَّتْ عَلَيّ وتمرّنت
    طبيعتي ما اتْبَعْ بروقٍ مصدّه*** ما اندان لي من صَدّ عنّي ولا اندنت
    البِلْ تجمّعْ عند صوت المودّه *** والناس تجمعها المحبّه ليا احسنت
    الله يخون الحب والله يلدّه *** شَرَوا وبِعْت ببَيْعَة الغبن واغبنت
    وقت مضى ما لي عن الريم صَدّه *** واجزلت عن طرد الجوازي وهوَّنت
    وان نام عابد غرفته والمخَدّه *** ورّكت باكوار الركايب وْرَكْبَنْت
    دِرْت الصحاري بالعنا والمكدّه *** وخضت المحيط وعمت وابْحَرْت واسْفَنْت
    وطيت خَدٍ ما وطَتْ رِجْل خَدّه *** إلاّ قدَمْ رجلي بعدما تكوَّنت
    رويت من دَرّ اللبون المجِدّه *** قبل السنون وخلفتي عقب سنَّنت
    شِعْر بناه الشيخ صَعْبٍ مشدّه *** أجهدت بالبنيان ياشيخ واتقنت
    فكرك نظيف وخطّتك مجرهدّه *** إلى رسمت أفكار ِشعْرك تفنّنت
    قريت مضمونك وْجَهَّّزت رَدّه *** ما أنت مْتيَاسِر يا ابن راشد تيامَنْت
    عندك تهون وتنتهي كل شِدّه *** وقت القسا لو الجبل لان ما لنت
    تاردْ وتطوي للمواريد عِدّه *** بالعِرف والمعروف ِزنْت وتوازنت
    (حاتم) عطيته يَدْك واخذت يَدّه *** على المكارم يا فتى الجود هَيْمَنْت
    ذكرك يسِرّ الروح ويفوح نَدّه *** سلطان عِزّك فوق عرشه تسلطنت
    ما يْزبِّنْ إلاّ طيّبٍ فيه سَدّه *** وانت الذي في ساعة الضيق زَبَّنت
    قولٍ مثِل نقد الدراهم نِعِدّه *** رصدت له غالي حلالي وْعَرْبَنْت
    ما حاك في خاطرْك يا شيخ بَدّه *** عن كل ضبع بْجاه رَبّي تحصَّنْت
    وان كان جاع الذيب عََشّه وغَدّه *** يمناك تحري بالشَّحَمْ حيثما كنت
    والسبع لو شَدَّيت عشرين شَدّه *** يضوي ولو للسيف الارخم تبطّنْت
    وبعض الرياح العاتيه مستبدّه *** ما تنحصر بالميل والمتر والسِّنْت
    واليا نزَلتْ بْروضةٍ مستجدّه *** بالعشب أبو نوّار واطنت واطنت
    طيرك ليا منّه طَلَعْ لا تردّه *** شِل بِرْقعه واخذ الرَهن كان راهنت
    دوّرت أبو وجهين وازريت أشدّه *** صرّحت عَنْه بكل الأوطان واعلنت
    فِلّ الكتاب وصاحبك لا تِضدّه *** والظاهر انّي عن معانيك بَرْهنْت

    من مجلة الصدى
     

مشاركة هذه الصفحة