مقاله سااااااخره

الكاتب : KILLING MAN   المشاهدات : 432   الردود : 3    ‏2004-01-25
      مشاركة رقم : 1    ‏2004-01-25
  1. KILLING MAN

    KILLING MAN عضو

    التسجيل :
    ‏2004-01-23
    المشاركات:
    24
    الإعجاب :
    0
    [move=left]فن الاحتواء في توثيق هدارة حواء- مقال ساخر [/move]اعتاد الناس على المقدمات في كل شي الكتب والاخبار والمواضيع .. انا اكره سماع كلمة مقدمه بصراحه مقدر اوصف لكم شعوري
    تجاه هالكلمة
    ﴿ قبل برج الجوال ﴾
    - على طاري شعوري يقولك فيه سوداني اصيب باللشل الرباعي عاد يسولف على خويه ويقوله : واللهي زاتي ماقادير
    اوصف لك شعوري خايف امشي من الفرح -
    ﴿ بعد برج الجوال ﴾

    لانها تذكرني بالبلديه يوم قدمت طلب فسح بناء لارضي الـ 350 متر ماصفالي منها الا 200 متر بس والباقي راح ارتدادات ومقدمه
    وكل يوم والثاني موظف الصندوق العقاري والبلديه طابين علي ومزعجيني على المقدمه علشان كذا كرهة اكتب مقدمه
    في مواضيعي من باب درء المفاسد بالشبهات ..
    ___________________
    ___________________

    هذي هي الحقيقة عن بنات حواء – حريمنا - ويلومون الرجال على تعاملاتهم الدفشه مع الجنس الناعم . والله ياجماعة الخير بعذرنا اذا صرنا مانتعامل مع الحريم الا بأسلوب قاسي :
    وين الغدا . بطلع للاستراحه بنام لا احد يزعجني . مافيه روحه للسوق ولا عند اهلك . انتي ماتعرفين تطبخين انا وش الله بلاني بك وباهلك .

    تدرون وش المشكله الحين هو في الاصل مافيه مشكله (( طيب ليه فاتح موضوع ومزعجنا )) ابد حبيت ابين لكم
    بعض حركات حريمنا واللي تطلع من غير قصد وبعفويه وحنا يالرجال ناخذها بجد لان بعض حريمنا الله يصلحهن ماحولك احد ماعندهــا
    اسلوب في توصيل المعلومه ولا عندها ذوق في اختيار الكلمات المناسبه للموقف يعني تنطل الكلمه على عماها ولا تدري وش هي تقصد
    صحيح انها رفله لكن الرفاله طبع متأصل في حريمنا ومايهنى للحرمه انها تظهر هالرفاله الا فــــي مواقف مال امها داعي

    ___________________
    ___________________

    تجي في احد الايام والنفسيه منشرحه لانك ماخذ مكافأة من الدوام او مستلم انتداب لك له عشر سنوات مابعد نزل لك بالميزانيه
    - والله لو ان هالميزانيه وقفت على انتداب هالضعيف –
    وترجع لبيتك وتستقبلك ام العيال بأحلي صورها واجمل ملابسها – ملابس المطبخ والكشه منتفشه والملاس باليسرى وريحة الكشنه
    تعجعج – وانت مستانس وبدال ماتقول لك : فديتك يابعد روحي عسى هالضحك على وجهك مرسومه طول الايام والله يسعدك يارب .
    تجي وتقولك وهي مكشره : هاه انت جيت .ترد عليها وانت مبسوط : يابنت الحلال وسعي صدرك الله فرجه علينا وابشرك انتدابي اللي
    قبل عشر سنين استلمته اليوم ..فترد عليك : طيب قم عب الغاز .ونبي مقاضي للبيت ، وتلحقك بالاسطوانه المشروخه اللي ترددها كل
    يوم الثلاجة فاضية .تطلع لغرفتك وتلعن ابو الساعه اللي اخذت هالحرمة من بيت اهلها . وتلعن ابو الساعه اللـــي تــزوجــت فــــيـــها.

    إن جمال المرأة لا يساوي شيئاً إلى جانب سلوكها
    ___________________
    ___________________

    يمكن مصيبة خوينا راعي الانتداب تهون عند مصيبه الرجال اللي مسوي فيها اتيكيت يطلع اهله يمشيهم بالاسواق والمجمعات التجاريه والا يطلع معهم يتعشى برا .. يطلع لمحل ملابس نسائية هو وام العيال وطبعا هو مسوي فيها عند الناس انه انسان متفهم ومثقف .. – بس مهوب ليبرالي – واللي يبيع سوري . . وتجيك ام العيال تسبل عيونها على السوري وهو يرطن عليه والمشكله انت واقف معـها . وماتساله الا عن الملابس اللانجري .. والمقاسات مابقي الا تقوله تعال خذ مقاساتي .. واذا قلت لها شي قالت يايييزن هرجة الشوام ماودك يسكتون ابد .. ، عز الله اللي رحت يالرجال وطي ومعاد لك أي احترام .. وتلومونا يالحريم اذا قلنا لكم مافيه طلعه للسوق ..

    عنز الشعيب ماتبي الا تيس الغريب

    ___________________
    ___________________

    تدخل على اهلك ياولد مافيه احد (( النداء السعودي الموحد لدى جميع العوائل )) وتدخل عليهم والا اهلك متغطين عنك . تقولهم خير
    ان شاء الله وش بلاكم متغطين . ترد ام العيال : وهـ حسبتك رجل . بالله اجل انا الحين وش طرطنقي .. وترد عليك يقالها بترقع
    الموضوع لا انت منتب رجال ياليتك على الاوله ابرك لكل مير .. بس حلوه حسبتك رجل .. غدينا ياناس جنوط ..


    ___________________
    ___________________

    لا اتركو هالسالفه فيه شي اعظم وطامه كبيره .. عندك سواق في البيت عادي تجي يوم وتلقاه قاعد بالحوش وهو يفتح الباب للناس
    وبعض الاحيان يوصل عند باب غرفتك هذا اذا ما ادخل جوا الغرفه بعد .. واذا قلت شي للحرمه لايدخل البيت قالت : عادي وش فيها اذا
    دخل مهوب سواقنا وهذاني اركب معه ..الحين تعلن ابو السواق ويمكن تسفره طبعاً اذا انت رجال مش حالك اعتقد انك ماراحت تجيب
    هالسيره ابد و تغمض عيونك عنها غصبن عنك .. والا اخوك لو يدخل الحوش تلعن ابو جده ،، ليه يدخل بيتي وانا منب فيه .....

    قالوها الاولين (( صبينا مثل ابينا ))
    ___________________
    ___________________

    ومصيبه عن مصيبه تفرق ، وكلها تهون عند مصيبة ابو محمد اللي مايحسد عليه مع زوجته الله يكون في عونه اللي كــل مـادخـل بــيـتــه
    ربط عصابه راسه واستعد للحنه والرنه من زوجته ام محمد واللي ماتحب تمدح الا رجال حريم جاراتهااو خواتها والا رجلها ماقد امدحته
    ابو محمد شفت فلان رجل اختي قال كذا .. ابو محمد سمعت خالد رجل اختي شريفة وش يقول يقول انه بيشري قطعة ارض ويعطيه زوجته
    هديه منه ... ابو محمد ماشفت جارنا ابو دحيم ياهووه يازين سواليفه والله ياحظ زوجته بهالرجال ياليـت كــل الــرجـال مـثـلـه مـحـتـرمـيـن
    ويقدرون حريمهم ويحشمونهم ... وخذ من هالمواوويل اللي مالها نهاية وانت يابو محمد مالك اي قـيـمـة وكــل اللــي تــسـويــه خــرطــي

    لــولا الــغــيــره مــاكــبــرت مـنـيـره
    ___________________
    ___________________


    اصبرو ودي ارقعها لعلي وعسى اجد مخرج من زعل حريمنا اقولهم

    لو جردنا المرأة من كل ميزة .. لكفاها شرفاً أنها تمثل الأمومة

    وان شاء الله اني رقعتها لكم

    ___________________
    ___________________


    منقول
     
  2.   مشاركة رقم : 2    ‏2004-01-25
  3. عزالعرب

    عزالعرب قلم فضي

    التسجيل :
    ‏2003-09-13
    المشاركات:
    3,728
    الإعجاب :
    0
    حلوه جداً

    شكراً
     
  4.   مشاركة رقم : 3    ‏2004-01-25
  5. لابيرنث

    لابيرنث مشرف سابق

    التسجيل :
    ‏2002-05-11
    المشاركات:
    7,267
    الإعجاب :
    0
    صدمتني كلمة منقول

    فرحت في البداية حسبتك انت اللي الفتها

    لكن مقبولة وشكرا على المقالة
     
  6.   مشاركة رقم : 4    ‏2004-01-25
  7. مُجَاهِد

    مُجَاهِد قلم ماسي

    التسجيل :
    ‏2003-05-11
    المشاركات:
    14,043
    الإعجاب :
    0
     

مشاركة هذه الصفحة