اختــــــــــــــلافات فكريه

الكاتب : NOOR6   المشاهدات : 374   الردود : 1    ‏2007-10-19
      مشاركة رقم : 1    ‏2007-10-19
  1. NOOR6

    NOOR6 عضو

    التسجيل :
    ‏2007-10-16
    المشاركات:
    12
    الإعجاب :
    0
    محمد وأحمد ولاد هدى* أخت سماح صحبتى فيهم شقاوة ما تتوصفش
    محمد عنده أربع سنين ونص
    وأحمد عنده سنتين

    هدى دلوقتى حامل فى الشهر التالت.. هى عايزة تجيب بنت المرة دى
    نفسها أوى فى بنت

    بس مصطفى جوز هدى مش عايز يجيب بنت.. هو عايز ولد تالت
    مصطفى خايف انه يجيب بنت
    هو حامل هم "البنت اتأخرت بره البيت".. "البنت بتلبس كده ليه؟".. " البنت ما تجوزتش لحد دلوقتى!". هو رافض جدا يجيب بنت
    مصطفى بيتوعد لو جت بنت، هينتقم.. هينقبها وهى لسه فى اللفة

    هدى زهقت من شقاوة ولادها.. مش مستعدة أبدا تجيب ولد تالت يطلع زى اخواته.. وكل الاولاد اشقياء طبعا
    هى عايزة بنوتة.. وتكون حلوة.. عنيها ملونة وشعرها ناعم زي مامتها
    هدى عايزة البنوتة عشان تلبسها لبس البنات.. لبس البنات احلى من لبس الاولاد
    هدى عايزة تسرح شعرها الناعم وتحط لها توك من كل شكل وكل لون
    وتعملها شعرها قصات.. مرة كيرلي ومرة الا جارسون
    وهدى بتتوعد لو جابت ولد، هتنتقم ومش هتجيب له هدوم جديدة.. هتخليه يلبس هدوم اخواته القديمة

    مصطفى مش عارف ان خلفة البنات نعمة من ربنا
    مش فى باله لما الزمن يعدى والبنت تكبر وتبقى هى الايد الحنينه على كتف ابوها
    وتبقى هى اللى تحت رجله وبتخدمه بعنيها
    وتبقى هى اللى ممكن تقعد تسمعه وهى بيحكى حكايات قديمة، اخواتها مش مستعدين يضيعوا وقتهم فى سماعها
    مصطفى مش عارف ان خلفة البنات بتدخل الجنة

    هدى بأه.. مش عارفة ان البنت مش عروسة حلاوة
    مش عارفة انها هتكبر فى يوم وتتصرف فى شعرها زى ماهى عايزة ـ تطوله تقصه.. شعرها وهى حرة فيه
    هدى مش عارفة كمان ان لو عيون بنتها ما طلعتش ملونة وشعرها لو مطلعش ناعم بتفضل بردو بنت.. بكيانها وافكارها وعقلها

    احمد ابن هدى ومصطفى لما يحب يعبر عن اعجابه بحاجة بيقول عليها: سكر ودادى.. يعنى سكر وزبادي
    هدى ومصطفى مش عارفين ان خلفة البنات.. سكر وزبادي

    هدى ومصطفى لما يجيبوا ان شاء الله المولود(ة) الجديد(ة) لازم حد يقولهم كل الكلام ده كله
    انا عن نفسى هكلم هدى.. مين يكلم مصطفى ؟؟
    ---
    الحدوتة حقيقية والاسامى مش حقيقية
     
  2.   مشاركة رقم : 2    ‏2007-10-19
  3. NOOR6

    NOOR6 عضو

    التسجيل :
    ‏2007-10-16
    المشاركات:
    12
    الإعجاب :
    0
    هل تحصل لكم اوتدور في فكركم ؟:)
     

مشاركة هذه الصفحة