صفات الشباب والبنات حسب سياراتهم )

الكاتب : hammam   المشاهدات : 433   الردود : 1    ‏2002-11-14
      مشاركة رقم : 1    ‏2002-11-14
  1. hammam

    hammam عضو

    التسجيل :
    ‏2002-11-07
    المشاركات:
    26
    الإعجاب :
    0
    ( صفات الشباب والبنات حسب سياراتهم )


    لكي تعرف عزيزي شخصيتك ابحث عن سيارتك واكتشف نظرة الناس اليك ... فقد كتبت هذا الموضوووع بعد بحث واستطلاع دام طويلا واليكم هذه النتيجه.... ؟




    رويس ريس



    الشباب : شباب هذه السيارة فخورين بانفسهم الدشداشه نظيفه والغتره بيضه كلشى نظيف فيهم ما تشوفهم ولا تلقاهم الا ايام الويك اند وطول الاسبوع السيارة تحت المظله واماكنهم معروفه والبنات ركضه وراهم على بالهم بنك متحرك ما يدرون انهم ابو البخل ... اما اصحاب الموديلات القديمه فهذوله اخر مسخره مايدرون ان احنا في 2002 وان موديل سيارته منتهيه صلاحيته... اللى يسوق بـنـتـلي هذا مخه مصدي ... حده بخيل وما يـنـدي

    البنات : ليحوشك وخر عنهم احسن لك ولا تفكر تلتفت صوبهم اخرتها يا ابعاد او سجن مؤبد





    فيراري





    الشباب : نوعيتهم من يدق سلف الا العداد وصل 160 على باله داش سباق ومن يشوف بنت بالشارع طار ولما يوصل لها تلقاه قام يمشى 20 يعني شوفيني عندي فيراري ويسوي روحه مو منتبه لها يعني لحقيني والمشكله اكثر اللى يسوقون هالسيارة يهالووووو ومن يطق له بنجر تـلقي دق على ابوه وقاله بااااباااا اللحقني انفش تايري شسوي اشتر لى وحده ثانيه

    البنات : لا عاد البنات غير هني يمشون 80 عشان تحر البنات اللي دار مدارها ومساكين كله ضايقه خلوقهم لانه محد يلحقهم لانه الشباب من يشوفونهم على بالهم هذوله محد يقرب صوبهم.. يبه لحقووووهم مساكين كسبوا فيهم اجر مو شارين سيارتهم ببلاش





    بورش





    الشباب : كوووووول بس صخووووول فراره بالشوارع 24 ساعه وساعات 48 ساعه القصات اخر موديل واللبس اخر صرعه والحبيب صاير لى نفيسه عشان عنده بورش ومضايق خلق الله بالتبتون وكله على باله اهوا الزين والقوي مصدق روحه على باله مشهور.. بس احسن شى في سيارته انه اذا مل منها يحولها طراد لانه مكينتها ورا....اما اللي يسوقون كاريرا ناعمين وكل سوالفهم عن سويسرا واللى يسوقون بوكستر يهالووو ما يعرف الدبه من المدقر

    البنات : يا حليلهم يضحكون في امك خير ما تعطيهم ويه ثاني يوم اسمك على كل اللسان فلان لاحقني فلان يحبني فلان متولع فيني فلان خاطبني بس بس صواريخكم صارت اسرع من سياييركم عقلوا شويه ركدوا جنكم مو شايفين خير



    مرسيدس بنز





    الشباب : اكثر اللى يسوقونها شغل أجار و للاسف راحت قيمتها لانه كل من هب ودب قام يركبها خاصه الحوت والكوبيه وال اس ال تلقي القـيز ساكنين بفريج واحد يتحاططون ويشترون لهم اي نوع من الانواع اللى ذكرتها وكل اسبوع يسوقها واحد فيهم تري من صجي صدقوني في من هالنوعية ... الحوت كان بس يركبها اصحاب البشوت ... اما الحين فصارت حــق الجياكر والسحوت الكوبيه من تمر قبل قالت الناس اللللله كوبـييييه ... الحين من تمر قالت الناس بشـيييييه اوفـيييييه اس ال قبل لما تشوفها تصلب وتـنشل ... الحين من كثر ما تشوفها عيونك تحول

    البنات : بصراحه البنات خوش بنات ولكن اكثر اللى يركبونها امهات وخاصه ام عيون اربع بـيـبان ما عدا اس ال كيه اللى تركبها فاصخه الحياء وعايشه بعالم مو عالمها مسكينه يبيلها دكتور نفسي اما بالنسبه حق ال سى ال كي هذوله دفاشه بالشارع مادري ليش كله مطيورين مساكين مادري منو قاص عليهم وقايل لهم دوسي سرعه يلحقونج الشباب




    بي أم دبليو




    الشباب : اكثر ناس مربحه شركة البترول شنو يصبون بانزين بل بل بل من الفراره وين ما تروح تلقاهم مكودين بكل مكان و كل وقت وهوايتهم الفراره بالليل شعندهم مادري بس بصراحه فيهم ناس ذربه وفيهم ناس منحطه... اصحاب ال 700 اكثرهم سرسريه وعفـلنـقيه واصحاب ال 500 خوش شباب ميه ميه... بس راحت عليكم سيارتكم صارت دوريه اما اصحاب ال 300 اكثرهم خريجين ثانويه ... ووقت المغازل كلهم نشاط وحيويه

    البنات : لا البنات عاد خوووش بنات حبوبين ومساكين يكسرون الخاطر طلعاتهم معينه وبالليل بالبيت مندعسين تري مو لله قعدتهم بالبيت ما يبون يهيتون بالشوارع عشان الخطاب تحاذف عليهم مساكين يكسرون الخاطر على نياتهم حبيت اقولكم شى في هالزمن اللى قايم سوقه الخايسين ... اما انتوا فحظكم طايح والسبه انكم زيـنـيـن ... زمن عجيب يرز الحثاله ويكشت بالسنعين



    روفر





    الشباب : اللي يسوقون رنج روفر اكثر ناس مو متهنين واكثر ناس مالهم حظ لانه كل حياتهم بالوكالة وكل معاشهم قاطينه على يا قطع غيار او تصليح كاسرين خاطري بصراحه اذا كلش كلش بتمشون طقوا فره على الطاير وردوا البيت الاغلبية زينين وبين الناس تكانه وحبوبين عيبهم شغله وحده عصبيين... واللى يسوقون ديسكفري هذوله عاد هوايتهم انه يكلمون 4 او 6 بنات بنفس الوقت ما تكفيهم وحده وبالاخير كله طايحين عليهم رفيجاتهم مساكين حدهم يكسرون الخاطر على بالهم انه محد يقدر يطيح عليهم ومسوين روحهم خبره بالمغازل وهم غشيمين درجة اولي ... رنج روفر من كثر ما تروح الوكالة حاشتك بو زليقة ويبيلك بودر ديسكفري على باله الحبيب الحاج متولي ... ما يدري شنو مخشوش له ومستخبي


    البنات : يا عيني على بنات هالسيارة مغرورين ستايلهم حلو وذوقهم احلي وباللبس ذويقين عيني عليهم بارده لكن لاتصدقون روحكم تري اغلـبـيـتـكم ملطخين ويوهكم بالمكياج والاغلبية بعد مصبغين شعوركم ما بقى بعد الا تصبغون حواجبكم شفيكم جذيه كلشى فيكم تركيب خلكم على شغلكم الطبيعي احسن لكم انا ما اقول الا الله يخلى المكياج اللى سنعكم ... ولا بدونه تخرعون من جكركم ... عسى الله يهداكم ويحفظكم ... لانه ادري انه هالحجي ما راح ينفعكم



    جاكوار




    الشباب : يا عيني عليكم من كثر ما تفترون بالشوارع القار قام يشكي منكم لا ويقولون انه هالسايره ما تصلح حق جو ديرتنا شوفوا انتوا شتسون فيها مو مخلينها تاخذ نسم تقول معاقبينها حتي واهيا خربانه تـفترون فيها بسكم شنو هذا ؟؟؟؟ رحموها والله حرام المفروض في ديرتنا يشيلون صورة الشعار اللي على السياره ويحطون شعار حماااااااار مسوينها ربعنا حمار مكده الله وكيلكم بصراحه اكثر اللى يسوقونها نصابين درجة اولى ويا حبهم حق التصنع ويسون روحهم مأدبين يعني احنا ما نغازل ولا نعرف شى واهما مرجع المغازل واساسه... اصلا قانون المغازل صدر منهم وهوايتهم الرئيسية ملاحق البنات وتوصيلهم ليه بيتهم حشى باص مدرسة ... يا سايق الجاغوار الله يا كثر ما تـفتر ... وبين الناس مسوي روحك مستر... عقلك صغير عمره ما يكبر... وفي ملاحق البنات ما في منك اشطر


    البنات : تبون الصج احلي بنات اللى يركبون من نوعية هالسيارة بس شنو مو اي نوع فقط اللى اربع بـيـبان مو السبورت باب واحد لا هذوله سلمكم الله دعوووول وملالالالاقه وفري زياده عن اللزوم مسوين روحهم اجانب مره كلمه عربي ومره انجليزي يعني مثـقفه حلايه ويها ولو تـفتش من وراها تلقها انجحت بالقصب بالدز بس عشان تدش الجامعه واكثر نوعيه من اللى تخزك بطرف عين



    لكزس




    الشباب : يا حليلكم انتوا وينكم انقرضتوا شسالفه ماكو صيد هاهاها مساكين مبتلشين ادري شنو تعانون منه كله مفلسين وكل من يطالبكم و السيارة اقساط وفوق هذا وايد تلزقون بالاماكن الكشخه وانتوا دينار ما عندكم حق بانزين تموتون على الاماكن اللى فيها لويه ويا حبكم حق الصالحيه واماكن الهاي هاي مسوين روحكم جخ وانتوا بخ بخ بخ احترس نفسك تري انت بالاصل قاعد تسوق تويوتا لا تـنسي هالشى حبيبي بس تري سيارتك مكشخينها شويه ومدلعينها لا اكثر ولا اقل


    البنات : اكثر نوعيه تحب الجذب بل بل بل الجذب عندهم بـبـيزة واكثر نوعية تمسك التيلفون بالسيارة عاد شوف منو قاعد تكلم مسويه روحها مهمه الاخت وساعات اذا الشارع زحمه واهيا بوسط الناس تمسك التيلفون وتهذر بينها وبين نفسها ولو تشوف عدل جهازها تلقاها مو قاعده تكلم احد بس جذيه خرابيط يعني انا وايد ناس تدق على ووايد ناس تسال عني الحمد الله والشكر تحمدو ربكم هذى بداية مرحلة انفصام الشخصيه



    أودي




    الشباب : يا عيني عليكم تسون نفسكم ذربين وتكانه وما تلفتون بالشارع وانكم ماشين على الصراط المستقيم وانتوا من بره هالله هالله ومن داخل يعلم الله يحبون المواعد بشكل رهيب اكثر ناس خبره بالمواعد واماكن المواعد وشغلهم من تحت ليه تحت خشاشي بس تبون الصج تري نوعيتهم غريبه... اكثر نوعيه بالخيانه الزوجيه... واكثر نوعيه بالفراره عند الجمعيه شعندكم تفترون بالجمعيات شنو اكو هناك ؟؟؟؟ بعد قولوا لى تشترون اغراض حق البيت اي بالعيد حدكم كلش كلش تشترون زقاير وتمشون لاحظوهم عدل يا جماعه اكيد في سر ! ! المهم كل شباب هالسياره نفس الوصف اللى مساع الا نوع واحد تي تي هاهاها والله عيب استحي اركب سيارة اسمها جذيه تي تي عاد كلش عاد ولا هالنوعيه شنو مصرقعين لما يسوقون لاحظوهم عدل وميزتهم يفترون بمكان واحد رايحين ورادين ما اقول الا تي تي تي تي... زي ما روحتي جيتي


    البنات : عاشوا عاشوا والله بصراحه بنات هذى السياره مشاء الله عادي العلاقه وياهم جنهم واحد من ربعك 70% منهم صبيك عادي تهاوش وياك بالشارع اذا خزيتها او تحرشت فيها اعتبر نفسك باعداد الميتين تري دايما خاشه تحت كرسي سيارتها درنفيس ولا ليور دير بالك لا تصكك فيه وبعدين شسالفتكم ما تعرفون تمكيجون حطوا لكم مكياج سنع نفس الاوادم


    كاديلاك



    الشباب : اووووووه يا ولد شعليه من قدك محد يكلمك الكل على باله انك يا شيخ يا شخصيه كبيره بالدوله النسفه طايحه جنك معرس والشوارب اخر تحديد واللحيه حالقها بجزازه من كثر ما يلمع خدك ونفييييييييييسه رافع خشمك على الناس وفوق راسك ريشه عيني عليك بارده ليكون مصدق روحك اذلف زين تري انت حدك صلبي ما عندك لا اصل ولا فصل مسكين حدك عايش الدور بقوة العن شى عندك لما احد يعرف منو انت وشنو اسمك لانك دايما تـقمص شخصيات وهميه واكثر شى يخوفك لما تمر بـتـفتيش الشرطي اول ما يشوفك شوي وطق لك تحيه... لكن لما يشوف الاجازه والدفتر يقولك اسفط يا ولد الكاوليه


    البنات : صحيح انه قله يسوقون من نوعية هالسيارات من البنات بس ماني هادكم الا بعلق ما فيكم شى لا تخافون زينين بس مشكلتكم حيل واضحين انكم امهات وربات بيوت وعمركم فوق ال 30 تدرون ليش لانكم ما تركبون هالسيارة الا وياكم السايق مسكين شلختوووه مكدشينه تـكدش زيدوا معاشه على الاقل وبعدين هذوله نوعيتهم صج امهات بس كشيخات يعني ما يعترفون بلبس العباية والملافع لا شغلهم سفوووور ما تفرق بينهم وبين بناتهم يا عيني عليكم ويقولون بناتـنا فاصخين الحيا بلبسهم شوفوا امهاتهم شنو يلبسون


    فولفو



    الشباب : سمعنا انه هذا النوع من السيارات يقال انه أأمن نوع من السيارات لكن اللى يشوف الشباب يقول هذا أسوء نوع من السيارات كله مدعمين خلق الله فيها وكله لاعنين ابو اسلافها اكثر ناس ما تعرف تسوق وكله يقولون داعمينا واهما اللى داعمين مالكم شغل فيهم تري غشم بالسواقه وبعدين كاسرين خاطري يشترون سيارتهم بسعر غالي ووقت البيعه ما تسوي ولا فلس حبيت اهديكم شعر ... يا أصحاب الفولفو يا مساكـين .. سيارتكم مدعومه شنو بتسون الحـين .. دفعتوا دم قلبكم طول هالاسـنين .. وبالنهاية سعرها ارخص من الطحـين ... بـيعوها احسن لكم لاتصـيرون من الخسـرانـيـن ... ما تسوي عليكم باجر ينادونكم المديـونـين ... تري محد ربح غيركم شركات التأمين ... بس ماكو فايدة هذى اخرة التدعم والبتويـن

    البنات : نفس الشباب سبحان الله نفس نوعيتهم السياره الوحيده هذى اللي ما تفرق بين الشباب والبنات نوعيه وحده لكن البنات يمكن بزود يبيلهم نظارات وين ما تسفط حاشت لها سيارة وزلقتها ديروا بالكم لا تسفطون يمهم تري سيارتكم تروح فيها وسوري خاصه المحجبات وخر عنهم نصيحه كبيره اهديها لكم تري هذوله مو مقدمين اختبارقيادة قبل ليطلعون اجازه لالالالالا صدقوني مقدمين على انتحار قيادة بايعينها حدهم ما يهمهم سيارتهم ولا سيارة غيرهم اناشد شركات التأمين ... بعدم قبول اي طلب من هالميانين



    جيب



    الشباب : ايواااااااا خوش خوش فيني رقصه صدقوني من تمرون صوبهم تحوشكم رقصه شوفوا هذوله عاد المسجله اللى بسياره عندهم اهم من المكيف لو بالصيف غرامهم وعذابهم الموسيقي وكله معلين على صوت المسجل اول ما تمر يمهم على بالك انه في ديسكو قريب من المكان اللى انت فيه بس بالاخير تكتشف انه راكب هالسيارة اهوا صاحب هاللويه وهالازعاج لا وكل شغلهم انجليزي شدعوي عاد الحين فاهمين شى اقص ايدي ومن تركب سيارته على بالك داش محل اشرطه من كثر ما الاشرطه متـناثره بالسياره نصيحه لحد يتعب روحه ويشتري له شريط امش وراء واحد من هالشباب واسمع اللي تبيه من اغاني وبعدين هذوله لو تلاحظونهم تري كله هايتين بالشوارع وين اهلهم ؟؟؟ حياته كله بالسيارة وفراره بكل مكان ما يتعبون كلش ينام يصحي ياكل يشرب يبدل هدومه كله بالسيارة حشى فندق مو سيارة وعلي فكره دايما هالنوعيه يغنون اغنيه معينه لما بـيركبون سيارتهم هاهاها تدرون شنو يغنون سمعوا ... دوئي يا مزيكه انا راكب شيروكي خدينه وفرفشينا وحياة ابوكي


    البنات : اووووووه !! الله يعنيكم اكثر بنات يلحقونهم الشباب وين ما يروحون لاحقينهم على فكره مو عشان اهم حلوين لالالالالالا طل لانهم خفاف ريشه اكثر بنات يتلفتون واكثر بنات يحبون يفترون واكثر نوعيه تخز الشباب مو اي خز لا الخز اللى فيه مكاسر عفيه عيون شنو هذا بسكم خز عيب وين قاعدين ... الحمد الله والشكر بدال ما تعالجون روحكم من حب الشباب تعالجوا من خز الشباب






    دودج



    الشباب : انتوا تكسرون الخاطر محد يدري عنكم بالشارع ولا احد يلتـفت صوبكم حاولتوا تسون المستحيل عشان تصيرون رزه وكشخه لكن ماكو فايده ما عليه نوعيتهم من كثر الكل مو مطنشهم حاطين حرتهم بالزقاير لما بتركب سيارتهم سد خشمك لانك جنك داش غرفه الطباخ او السايق ريحه خايسه وكريهه تلوع جبدك وما عندهم هدف بالطلعه وين بروح ما يدري ومحد يبي يطلع بسيارته مسكين يبون الفكه منه حرام والله يكسرون الخاطر


    البنات : اكثرهم متـزوجات مالها شغل باحد مسكينه كلش كلش اذا تبي تطلع يا سوق الديره او مجمع النقره حق الدراريع او ماخذه عيالها وموديتهم الجمعيه يعطيج العافيه والله وعساج على القوه واكثرهم معتمدين على انفسهم يعني عادي تشوفها عند كراج تصلح سيارتها ما تخاف تعرف تصرف طبعا لا لها بالماركات ولا سوالف البنات اول ما تشوفها تقول بقلبك على طول هذى ربة بيت



    فولكس فاجن




    الشباب : بصراحه مادري شنو اقول بس بختصر حيل في تفسير هالنوعيه اولا اللي يسوق فولكس تلقاه بكل مكان مندعس واللى يسوق باسات يموتون على البنات واللى يسوق بورا بعد ما يحتاي عينه عورا


    البنات : اكثر اللى يسوقون باسات نصهم يا متحجبات ودينات والنص الثاني طقاقات واللى يسوقون فولكس خفاف حدهم مثل الكـلـينـكس واللى تسوق بورا هذي صج عاد طلعت بورا


    فورد




    الشباب : احقر ما خلق ربي اكثر اللى يركبونها يلبسون جماغات ... واكثر اللى يسوقونها هيلق ومن ادني المستويات ... اهم صفة فيهم ازعاج البنات ... واكثر ناس يسفطونهم الدوريات... ويا حبهم حق الترقص في المسيرات ... والغريب فيهم انهم ما يعرفون يطلعون بروحهم لازم يترسون سياراتهم شباب وياليت اربعه ولا خمسه لالالا ساعات سبعه ثمانيه تسعه يكونون بالسياره ويا حبهم حق توصيل الشباب اللى بردون بيتهم تأشيرة هوايتهم توصيل الناس اللى بالشارع يعني مسوين خدمات ويا ويوهم وشغله ثانيه بقولها اللى يسوقون موستنغ هذوله عاد سالفتهم سالفه احقر واللعن ناس بالدنيا تشفط بالشوارع والتسكع تالى الليل اكثرهم تلقاهم يا محشش او سكران وين اهاليهم هذوله ؟؟؟ شباب غراند ماركيز اكثرهم هيلق وقيييييييز شباب كراون فيكتوريا اكثرهم عقد ياين من سوريا شباب الموستـنغ ماااااال تـفلش راسهم بكرة بولـينغ


    البنات : البنات هني شوية غير الله يستر عليكم مالى شغل فيكم بس انا ابى البنات المنقبات واللى لابسين ملفع نص تـنـتـه هذوله طبعا قيزيات درجه اولي من نقابهم تعرف انهم رايحين فيها الكحل تارس العين وريحتهم فايحه ريحة بعارين وتـلقي بالغلط تحط لك قذله شقره يعني جنها ما تدري انه قذلتها طالعه بره هاهاهاها والله انكم اي شى يعني على بالها اغراء ما لت عليج وعلى الاغراء اللى انتى تعرفينه طبعا القيز اللى مثلج يموتون انه يلحقونج ما تـنلامين اكيد بتستانسين صخله ولقت لها تيس يلحقها هاهاهاها


    شفروليت




    الشباب : طبعا هذى يسمونها سيارة العائلة لكن اي نوع كابريس بس اما الباجي لا يبه لهم حجي ثاني الكابريس اكثر اللى يسوقها يا ابو عيال او راعي تكسي دايما تلقاه اهوا ويا مرته طالعين ووياهم عيالهم صج سيارة العائله اذا تبي تعرفهم بالشارع اوقف عند الاشارة اذا سمعت من بعيد صوت مزعج ياي يمك ( أأأأأأأأأيييييييييص ) اعرف انه سيارة العائلة وصلت لانه دايما اللى يسوقونها ما يغيرون سفايفها هذى بالله سيارة العائلة الله يهديك !!! هذى سيارة الموت بدل سفايفها شناطر ما تخاف على اهلك... اما اصحاب الكورفت فهذوله اسمحولى اصيع ما خلق ربي صايعين درجه اولي في امك خير طوفه تلقاه ياك طاير بس يبي يثبت لك انه سيارته اسرع من سيارتك وين قاعدين !! رالي سيارات والصنف الثاني كماروا لا عاد هذوله اكثرهم مراهقين ويهالووو توه مطلع له اجازه وحان على ابوه يبي يركب سيارة سبورت هالنوعيه عااااااد سبب الحوادث في ديرتـنا شنو مستهترين وشنو ميانين الحمد الله والشكر من تمر يمهم بسيارتك تشوف اشكال غريبه عجيـبـه من وين ياين هذوله ؟؟؟ وفي بعضهم حيوانات ماكو شعور كلش يزفونه يضحك يـتـفلون بويها هم يضحك الحمد الله والشكر تحمدو ربكم عسى الله لا يـبـليـنا بليزر انواع اللى يسوقون هالسيارة يخرعون بالشارع تخاف انه يمشى وراك شكبر سيارته جنها فيل ويـبـتـون فيها واكثر ناس اسمحولى اقولها سكاره وشريـبـين خمر ما يعرف يسوق الا ومزاجه عالي ... تبطل دبته تلقي كراتين مالها اول ولا تالي جمس ( سوبر بان ) نوعيه داثره ونادر ما تلقي شاب يسوق من هالنوعيه من هالسيارات واللى يسوقونها يا عنده 8 او 9 يهال او يستعمل السياره حق نقل عفش او اغراض لومينا يعطيكم العافيه من الدوام ليه البيت ومن البيت ليه الدوام عايشين حياتكم كلها بداركم ما طلعون ولا تمشون مجابلين يا التيلفزيون مباريات كرة قدم او 24 ساعه مجابلين الاتنرنت عفيه عيشه ...... كابريس رب الاسره لما يركبها يستانس كورفت كل اللى يسوقها كماروا انتوا سبب خراب المجتمع ودماروا بليزر مشربوهم المفضل هـيـنـيكن وبودوايزر لومينا من قعدت البيت اجسامكم صارت متـينه



    البنات : وصلنا الي اوطي مستوي من البنات عموما البنات هني يسوقون نوع معين اللى اهوا لومينا بصراحه مادري شقووول كل الحجي اللى مو زين يركب عليهم اولا هوايتهم مغازل الشباب ا ومتعتهم انه يبوقون الزوج من زوجته خوش هوايه كفوو والله ولهم هواية ثانيه اهيا السحر والشعوذه الله يكافينا الشر ولهم هواية ثالثه اللبس الفاصخ والغير محشوم ... اما بالنسبه للي يسوقون بليزر هذوله عاد خوات الجيكر... من شيفتهم يسمونهم الميكر






    هوندا




    الشباب : بصراحه اكثر اللى يسوقونها ناس معقدين همهم بس في دراستهم وعملهم اغلبهم يلبسون نظارات بل بل من الدراسه لدرجه انه مو هامه شنو يركب من سياره عادي عنده ومساكين كاسرين خاطري اكثر ناس يخالفونهم المرور تدرون ليش ؟؟ تلقاه ساهي يفكر بمعادله و لا عملية حسابـيه وبالغلط ينسي ويطوف الاشاره الحمراء وبالاخير يسالونه المرور انت مخالف ولا لا يقولهم لو قسمنا 133255 على 343 الناتج يطلع 388.498542 ولو ضربتهم ب 3453 وجمعت فوقهم العدد اللى في بالى الناتج يطلع انا ماشى 80 كيلو متر والاشارة صارت حمراء قبل 6 ثواني من طفتها مشاء الله شنو هذا الـلـه اكـبـر الـلـه اكـبـر شنو هالمخ شنو هالعبقرية هذى ... مسكين عاد المرور ينفع وياهم هالحجي زخووه وقطوه بالدورية ... وطاروا فيه مستشفي الامراض العقليه

    البنات : حلمها ومني حياتها انها تطلع يوم من الايام ويلحقها واحد مسكينه محد يدري عنها جنها مو موجوده بالشارع تمر يمها والا شنو تشوف بس راس والباجي ماكو شى الحمد الله والشكر اكثر البنات اللى يسوقونها اجسامهم غلط لا رشاقه ولا اهتمام بانفسهم نصيحه تري في شى اسمه صالونات وانديه صحيه





    تويوتا



    الشباب : هذى عاد سيارة الدينين والمهتدين طبعا مستحيل يركب سيارته من غير مسباحه ومسواجه لو شنو اما بالنسبه حق اللى يسوقون كامري هذوله قصتهم قصه هذوله مشاء الله الاغلبيه راسهم بليه اكثرهم متزوجين ودفشين ومشفوحين وجسمهم متين مساكين يعانون من سيارتهم محد ملقيهم ويه كله يتحلطمون على سيارتهم وكله مو عاجبهم شى وكله يقولون بنشتري غيرها مو عارفين شسون بروحهم غرامهم المغازل بالاسواق الشعبيه يموووووتون على البنات اللى يلبسون ملافع ويطلعون قذلتهم بره شعليه قام سوقكم لقيتوا منو يـبـيكم تفضلوا عاد اي نوعيه ... اصحاب الكامري اللى صماخهم بليه لاندكروزر هذوله عاد يحبون سوالف السفر... ويموتون على شي اسمه باديه و بر ... كل رحلاتهم عن طريق الحدود البريه... نادر ما تشوفهم بمناطق سكنيه... دايما تلقاهم على الخط السريع رايحين صوب السعوديه ... اكو جيب انا شاك في اسمه برادو هذا مو اخو اللاعب البرازيلي ريفالدو


    البنات : يخرعوووووووون ما تشوف شى فيهم مجرد سواده كلشى مغطي فيها ويا ويلك يا سواد ليلك اذا لفيت عليها بالغلط ولا دودهتها خلاص اعتبر نفسك انت رحت فيها ما تسمع الا دعاوي الدنيا كلها عليك ( مالت عليك سليمة تصكك عمي بعينك عسى الله ياخذك يعلك الماحي اللى يمحيك ) بل بل بل اعوذ بالله بس احمد ربك انك حصلت لك على جذيه تري في غيرهم يـتـفلون



    نيسان




    الشباب : حبيت اقولكم شغله قبل لا اعلق انه مره من المرات وانا اتصفح الجريده والله منصجي مو قاعد اتغشمر لقيت اعلان من وكالة نيسان اشتر وانيت نيسان ولك هديه خروف هاهاهاها المهم ما يحتاي اعلق يمكن احسن نوعيه من الشباب اللى يسوقون باترول هذوله اكثرهم نوعيه هاديه جدا جدا مالها حس تركب وياهم جنك قاعد ويا صنم نوعية معقده صعب انك تعامل معاها اما اصحاب الوانيتات منصجكم تبوني اعلق اخاف اكفر لا يبه بسكت احسن لى اما اللى يسوقون التيما هذوله ناس غريبه انقرضوا مع انقراض نوع سيارتهم اما اللى يسوقون ماكسيما اكثر ناس تحب السرعه مساكين ما صدقوا على الله يحصلون لهم سيارة سريعه ورخيصه ما تشوفهم الا على الحاره اليسار طايرين جنهم صاروخ وبعدين هالنوعية اخلاقهم واطية عادي عندهم قلة الادب واكثر ناس تلفظ بالافاظ وصخه بالشارع جي تي هذوله عاد تصدقون انه حسناتهم وايد لا تستغربون تري ادري انهم كله يشفطون وعقد وهيلق وقيييزوسفله ومنحطين بس اكثر ناس عندها حسنات تدرون ليش لانه الكل يسبهم ويـتـفل عليهم فمن جذيه قاعدين ياخذون حسنات غيرهم زد ماني خابر انه في بشر نفسنا من لحم ودم يسوقونها !! باثـفايندر اسم هالسياره اللى يسمعه اول مره يـقول فيلم اجنبي لكن بالصج ياباني بحت المهم نوعية اللى يسوقون هالسيارة دمهم ثـقيل وسوالفهم كلها ملالالاقه لا اسلوب ولا منطق وخر عنهم احسن لك


    البنات : نوعيتهم اشكال وانواع اللى يركبون وانيتات دايما قاعدين ورا ومنجعسات ... براقعهم تطاير والسبه القرقعه والمطبات اما بالنسبة للى يركبون مكسيمات بالصبح تلقاهم جامعيات ... وبالليل اكثرهم طقاقات


    ميتسوبيشي



    الشباب : اكثر ناس متعلقين باهلهم وبيتهم يعني اللى متـزوج يعتبر سكانه مرته واللى مو متـزوج يسمونه دياية امه... اللى يسوقون لانسر هذوله اكثر ناس محبطين وين ما يطقونها عويه بودهم يطلعون مع ربعهم ويتمشون ويستانسون لكن حريمهم قاعدين لهم بالمرصاد اصلا هالنوعية عديمة الشخصيه واذا بيطلع ويا مرته تلقاها رابطته بسلسله وين ما تروح يروح وياها بس تدرون ليش اهوا اشتري هالسيارة ؟؟؟ ... لانه قبل الزواج كان يركب سيارة زقرتيه ... لكن مرته خذتها منه بكل قوة ودكتاتورية ... وبالاخير خلته يشتري هالسيارة الهـتـليه... الصنف الثاني باجيرو هذوله عاد دلوعة امهم ما يشك خيط ببره الا قايل حق امه اكثر ناس بالدنيا تطرشهم امهم والله يعنيهم برمضان الطلبات ما تخلص مثال ... قوم ود هالهريسه حق عمتك شريفه .... قوم ود هالتشريـبه حق خالتك سبـيجه ... قوم ود هاليريش حق بيت ام درويش هاهاها


    البنات : البنات هني اكثر شى يركبون باجيرو هالنوعية مشاء الله عليهم قطاوة من كثر ما عندهم عيال عيني عليهم باردة مكودين يهالهم في هالسيارة وفراره من مكان ليه مكان مشاء الله مشاء الله تف تف تف تف بعد مو تقولون حسدكم ولا شى سيارتكم الله ياهي حوسه ولويه كلشى تلقي فيها من حفاضات من دلاقات من شباصات من ككاوات كلشى تلقاه منثر ومعفوس فوق تحت في هالسيارة وكلشى يضيع في هالسيارة سبحان الله ما يطلع مره ثانيه هاهاها حشى بالوعه مو سيارة





    --------------------------------------------------------------------------------



    منقووووول
     
  2.   مشاركة رقم : 2    ‏2002-11-15
  3. مكي

    مكي عضو

    التسجيل :
    ‏2002-02-23
    المشاركات:
    57
    الإعجاب :
    0
    واللي ماعنده الا دباب !!
     

مشاركة هذه الصفحة