مزاد لبيع المجلس اليمني

الكاتب : amer alsalam   المشاهدات : 4,818   الردود : 49    ‏2007-03-10
      مشاركة رقم : 1    ‏2007-03-10
  1. amer alsalam

    amer alsalam قلم فضي

    التسجيل :
    ‏2005-07-26
    المشاركات:
    3,934
    الإعجاب :
    0




    المشهد الأول


    كان يومي يوم عادي .. قومتني محسنة #وسمعتني الموال اليومي : اقلك اكسر هذا المنبه .. ما معانا منه إلا كسرة الراس .. يرن يرن و في الاخير ما بتقوم إلا بسطل الماء الذي بتمليه قبل ما ترقد

    قمت والصبوح جاهز غسلت وجهي وغيرت ملابسي وفطرت ومحسنة رجعت تشتي ترقد .. *الله لو النوم بيزود رصيد في البنك .. إن بيل غيتس بيشحت في باب اليمن* قمت جلست فوق الكمبيوتر اشوف الاخبار وانا بين اقلها إذا تأخرت اليوم في العمل عد اتصل تتغدوا ..


    هاه .. ايش ايش

    وانا بين اقرا في الثورة أشوف بين الاعلانات بانر# مفاده .. مزاد بيع المجلس اليمني

    ابتلدت فتحت الصحوة، الشورى ،المؤتمر نت .. كلها بتعلن عن المزاد .. على طول ضغطت على الاعلان اشوف وان المزاد بعد اسبوع ... بتاريخ 13/10/2010م

    افتح المجلس .. وان الاقسام كلها مغلقة .. ومفتوح قسم جديد .... قسم الوداع


    من خارج القسم كنت اشوف الصمول بتتطاير والغبار مغطي على نطاق الرؤية.. باين من عدد الاعضاء المتواجدين ... دخلت اشوف ايش فيه من مواضيع ..

    الا ونص المواضيع عنوانها يدور تحت .. يا جماعة هو صدق المزاد والا زبج حامض ؟

    ومواضيع تنقل المقالات اللي نشرت في الصحف تعليقاً على بيع المنتدى عشان يصدقوا الباقيين

    واللي فتح موضوع من شاكلة .. سامحوني .. خاطركم ... في أمان الله ... إلى زعطان وفلتان إلى اللقاء.. وخلونا نتبادل الايميلات (الاخوة المــلجـــجين كانوا كثير في هذا الموضوع )

    ومواضيع النص الثاني .. كانت مواضيع رفض واعتراض على قرار العيسائي لكن هذه المواضيع ما شكلت غالبية .... كنا نشوف الموضوع لدقايق .. وبعدين يختفي ... ويختفي كاتب الموضوع مع موضوعه


    شوية ما فقدت إلا ومحسنة بتصيح بعيونها المورمة من النوم و هي بتشوف الساعة : يا آدمي مالك ما سرت العمل .. انت داري ان قدوا ظهر .. عد ارجع اكسر هذا الكمبيوتر الــ ..... لو انا داريه ما قومتك .. هيا لو كسرت ناموسك وقومتني اعمل لك الغدا ما دام وانت مرزوع عند المصيبة هذا ........

    الاسطوانة طويلة وعيب أعذبكم وانتو ضيوف الموضوع ,, خلوكم من محسنة الله يهديها وانقلوا المشهد اللي بعدوا


    *************************************************************

    المشهد الثاني


    كملت التميستين #وصحن الفاصوليا الحارق ... لا لا ما عاد اناش اكول .. اصلا التميسه هذه الايام قدي مثل بسكون ماري ... تاكلهن على الفاصوليا مثل ما تاكل ابو ملعقة

    المهم بعد ما كتبت رسالة اشندف# فيها معد يكرب .. وكووووول اليمن (هولا اعضاء عسل تعرفت عليهم نهاية 2008 على ما اذكر) لانهم قالوا عيجوا معي المزاد وفركوا بي

    حاسبت صاحب المطعم.. وشغلت أنيسة *هذه سيارتي* الحمد لله ريحتني من مداعاة الاخوة الشقاه من المطعم ينتعوا معي .. بيضت وجهي رغم إن الجو كان بارد في صباح الصبح .. وانيسة من أول ما اشتريتها مزاجها ما تمشي إلا وهي دافية اذا تغالظت عليها و قومتها بدري

    دخلت شارع الستين من جولة عمران .. قالوا المزاد في قاعة شرق المدينة السكنية الليبية .. ماشي في أمان الله وعبد الباسط بيسمعنا سورة التكوير من المسجلة <رحمه الله .. اسطورة زمانه> .. خرجت من الستين الى الشارع الفرعي اللي فيه القاعة تبع المزاد...ما أفقد إلا وبرميل مركوز وسط الشارع

    قلت معقول !!! قطاع #وسط صنعاء

    من طريقة تعامل الجماعة اللي على القطاع تقول هولا محترمين ... يشوفو صورتك ويقلولك امشي على طول المهم مشو السيارات سريع .. لوما وصلوا لا عند صالون في مقدمة الطابور وجنبوه .... واول ما جنبوه رفعوا البرميل .. علامةً إن القطاع انتهى

    مشت السيارات اللي أمامي لوما وصلت الى عندهم .. أشوف إلا والجماعة معروفين ..هذا عدو ابليس .. وهذا الامير الحاشدي .. وهذا اسير الشوق هذا أركان حرب .. وهذا أرحب ..واعضاء كثييير تقريبا شويه وعشرين عضو صورهم قد شفتها حين طرحوها في المجلس . طبعا معظمهم مسلحين (لزوم القطاع) قدمت لا عندهم .. الا اشوفهم كلهم ورا واحد هيبة .. وحزامه مليان رصاص والبندق حقه فلوجة *عادهوا خرج السوق قبل سنة..يعني :2009:*

    المهم صاحب الصالون نزل يكلم هذا الهيبة الذي عمل القطاع وهو بيغلق التلفون الجوال و اركان حرب وارحب بدأوا يفرقوا الناس المحوشين .. انا ملصت منهم ونزلت في جربة القات اللي على جنب الطريق وما هم منتبهين .. وصاحب الصالون وعدو ابليس والحاشدي واسير الشوق والشلة ورا المحزم فوق راسي على قارعة الطريق #

    طلع كبير المقاطعين المحزم.. ذو يزن .. و صاحب الصالون العيسائي .. وانا تحتهم بين اقول الله يستر .. هولا ناويين يخطفوا العيسائي ... شوية و ثلاثة جيوب وصلت .. والعيسائي يؤشرلهم من بعيد .. في ما معناه أن ابقوا في أماكنكم ... مختصر الحوار إن ذي يزن قال للعيسائي إن المجلس مش تبعه .. وان المجلس ما كانش عيبقاله قيمه لوما الاعضاء الذي رفعوا قدره .. والعيسائي بيسمع بهدووووء لوما كمل ذي يزن صياح .. شله العيسائي هو وجماعته على جنب ... و كلمهم دلى دلى .. ما سمعت إلا اسير الشوق ((على فكرة شكله يموت ضحك وهو مسلح تشوفه هو والبندق تحتار من اللي شايل الثاني)) وهو بيقل للعيسائي .... وعد يا عيسائي ... قلهم وعـــــــــد .. وانفضت الجلسة على هذا الوعد الذي ما دريتش ايشوه... رجعت سيارتي الذي جنبتها بعيد .. وانا راجعي شفت اركان حرب بيقل لبسيم اليمن مالكم فلتو له.. جاوبه اسير.. وعدنا إنه ما يبيعه إلا لواحد يحافظ عليه مثل ماهوه عاد الا فلتنا له

    الجماعة طلعوا فوق الصندوق حق شاص ساق ذي يزن وحن بهم .. و الصالون مشت بعد ثنتين جيوب وكملنا للقاعة

    وصلوا .. وانا وراهم .. دورت مكان اجنب السيارة .. جنبت ودخلت المشهد الثالث





    **************************************

    المشهد الثالث



    ما شاء الله .. هولا يمنيين !!! منين اداهم العيسائي !!! طول مترين .. وعرض الكتف متر

    مسكونا عند الباب .. وسؤلوني .. سلاح يا استاذ .. ضحكت وقلت فتشوا .. اشر بيده ادخل وكأن بيني وبينه ثأر [ المشكلة كل مرة اتفتش وين ما كان ضروري تكون صورته تفجعك .. كان ممنوع عليهم الابتسامة] ... ما علينا .. دخلت .. قاعة بحجم قاعة أعراس ..بينها كراسي وفي الامام طاولة ..وورا الطاولة ستارة .. يعني كأنه جو محاضرة ..

    الذي لفتني .. إن الناس مليااااااان .. والمجبر بصوت عالي .. كانك في سوق عكاظ (( مدري ليش الناس يقولوا سوق عكاظ وتلاقي والله ما حد قد دخل سوق عكاظ )) قلت في نفسي ايش بيعملوا هولا .. معقول كلهم يشتو يشتروا المجلس ..!! أكيد العيسائي عيبيعه بالذهب ما دام اعلن في الصحف الرئيسية

    سرت دورت لي كرسي اجلس عليه ... وراعيت يفتتحوا المزاد .. باقي تقريبا نص ساعة

    لقيت حاجة تلهيني في المراعاه ... وفهمت ليش القاعة ملان .. الاعضاء اللي عرفناهم بصورهم في المنتدى نصهم موجودين .. جلست اشوفهم كاني في مسرحية .. عجبتني حاجات كثير

    انا اعرفهم وهم ما يعرفوني , جلست اراقب هل العضو مثل ما هو في المنتدى .. واكثر شي يعجبك حين يتعارفوا بيناتهم البين .. انت فلان ... لااااااا .. مش معقول .. وبين لحظة واختها تشوفهم يتحاضنوا وعادهم قبل قليل ما كانوش يردوا السلام

    شلة الادارة كانو جالسين في حلقة فوق المسرح .. عرفت عادل احمد .. وصاحب الصالون من بينهم

    وفيه مجموعة بنات جالسات على جنب .. فييييييييي طرف القاعة

    وسبحان الله لقيت تجمعات الاعضاء .. مثل تجمعاتهم في الاقسام .. اصحاب العام مع العام .. أصحاب السياسي مع السياسي .. واصحاب التعارف شفتهم في الصف الثالث رغم ان نصهم زباجين .. لكن على وجوههم الكمهريرة (وما حد يسألني ايش معنى الكمهريرة لاني مش عارف)

    إلا أصحاب الاسلامي كل ثلاثة أو اربعة لوحدهم ..... لكن برضة مثل المجلس الاسلامي بالظبط ;)

    أما البنات جالسات وحدهن ... كانهن بيعترضين .. ليش ما في المجلس قسم خاص للسيدات :

    واحد جاء يشتي يتعرف ..وثوبه جخر .. وجنبيته شمااااات .. وبدأ التعارف بيعرض عليا اشتي شمه !! قلت له لا شكرا يا اخي .. المهم ما افيش داعي اقلكم انه خرج كيس الشمة وتبردق تبرداقة محترف عشان ما تشمأزوا ..بدأ يناخشني .. عفواً يناقشني يا اخي تقل ليش يشتوا يبيعوا هذا المجلس .. وانت ليش تشتي تشتريه .. وانت عضو ؟؟ أنا عضو .. أيوه أيوه ... أنا عضو ومعرفي .. محب الصالح .. أول ما قال هكذا خرجت مني آآآآآآآآآآه لا إراديا ... الله ياخذهم الامن السياسي ... أيحين عيتطوروا .. ايحين عيتعلموا ...(( ذكرني باحمد مطر وهو بيوصف اللي يجلس يلاحقة بنظارة سوداء والجريدة تغطي وجهه والمسدس على حزام بنطلونة))

    تخلصت منه بابتسامة الظاهر إنه افتجع منها .. كما انا ما استرش ازور ابتسامات وقمت غيرت الكرسي ...

    وقام العيسائي يشتي جلس على الطاولة .. وادوا له مكرفون ... شفت الساعة .. ايوه ... قد الساعة عشر بدأ المزاااااد

    *************************



    مدري ليش حاسس إني طولت في الموضوع ...يمكني طولت ؟؟ .. .. الظاهر اني طولت صدق

    خلاص يكفي اليوم .. واجي اقلكم الفصل الرابع .. والفصل الاخير وقت آخر ..ان شاء الله ..

    هذا إن وجدت اهتمام لمعرفة كيف سار المزاد :) ولمن انتهت ملكية المجلس اليمني

    ____________________________________________

    # محسنة .. زوجة المستقبل إن أراد الله ..... أيوة .. ايوة يا طحاطيح..كلنا مثل المدوفر نشتي زواجة :

    # بانر.. فلاش صغير يصمم للاعلانات على النت

    # التميس .. منك صدق ما تعرف التميس

    # يشندف... يعاتب مع شوية تهزيئ

    # القطاع .. هو أن تركز برميلاً وسط الشارع عشان تاخذ حقك بايدك من واحد ثاني .. او من أحد اقاربه

    # قارعة الطريق ........ لا ما فيش شي بس اشتي اسألكم كيف انا معاكم في الفصحى :p









    المشهد الرابع


    العيسائي بيقرا من ورقة ... وأنا حاسس إن الناس عادهم بيوردوا من الباب .. انا جلست اسمع ايش عيقول العيسائي (خصوصا وقد شعور معظم الاعضاء : عد معه وجه يتكلم :mad: ) المهم بصراحة جاب كلام حلو اقنعني .. بس فيه أعضاء ما اقتنعوش

    بدأ بتعديد الجوايز الذي أخذها المجلس .. على المستوى العربي واليمني .. وتكريم وزير الاعلام للمجلس وفوز المجلس بمسابقة المنتديات العربية و .. و ...

    قلنا هذه بضاعته ويشتي الزباين يرفعوا السعر

    رجع قلب .. بدأ يدي أسماء وانجازات :

    مهندس . محمد أسد ............. صاحب سلسلة روايات يمنية للجيب

    دكتور . حمادي الرعيد ..... مؤلف رواية الاسمر اليمني .. والحايزة على جايزة الشارقة للرواية العربية((قلت في نفسي الله يصيبها دولتنا .. مبدعينها ما يكرموهم إلا في القاهرة والا الشارقة والا جدة والا النرويج والا ......))

    والشاعر الشعبي ..... حمود اليافعي ....المنتخب كأمير شعراء الجزيرة


    والمخرج الكبير ... فهد المقرمي .... الناهض بالدراما اليمنية ورافع رأسها

    والصحفي الشهير .. بشير عبدالوهاب

    .. ما شاء الله ماهو ادى اسماء خيرات .. ما عد ذكرتهن ... بعد ما سرد رجم الاوراق على الطاولة ورفع نبرة صوته .. كأن الحاضرين طلاب حمير .. ويشتي يفهمهم بالغصب

    هؤلاء وامثالهم هم من صنعوا المجلس اليمني .. هم من رَقَوا بفكر الشاب اليمني ... هم من فازوا بالجوائز المذكورة وجعلوها من أوسمة المجلس .. وهم ليسوا بقلة .. هم الان يضاهون المليون عضو :eek:

    المهم لو كان المسكين بيدي كلمته في دولة ثانية كانوا بكوا من قوة خطابه .. لكن الرجال كان يشتي يبكي أبو يمن

    شَكَر ومدح في الاعضاء وفسر سبب بيعة للمجلس ... بان الجرعة الاخيرة كانت قاصمة لمشاريعة وميزانيته وله الحق كمالك وداعم للمجلس أن يستفيد من ملكيتة المكفوله له بالشرع والقانون واعتذر عن تخليه عن المجلس .. والذي كان غصبا عنه

    وقال وهو بيشقص واحد ورا(كأنوا بيقله : هاه كيف انا :cool: )# إن الاولويه لمن نراه مناسبا لشراء المنتدى وليس لمن يدفع الاكثر فقط لذلك سيظطر الاخوة الراغبون في شراء المجلس لتعبية الاستمارات التي ستوزع عليهم .. وأنه سعيد لانه راى هذا الجمع المحترم .. وأنه بعد ملئ الاستمارة ستدرسها لجنة وبعد دراسة اللجنة للاوراق سيبدأ المزاد بناء على الاسعار المعروضة في الاستمارات كسعر أولي.. وخلال دراسة اللجنة .. قال انه جهز برنامج بسيط للاخوة الحضور


    نزل .. ومثلما قلت لكم .. نصهم عجبهم الكلام ونصهم بيتبادلوا النظرات .. كانهم بيقولوا لبعضهم البعض * على من بيتمعرص الاخ

    هو نزل من المنصة وحوالي سبعة أنفار وزعوا الاستمارات .. أنا أخذت واحدة اشوف ايش فيها .. طبعا وكل موجود في القاعة أخذ .. (( كل ما يلاقوا الناس واحد بيوزع أي حاجة تلاقي كبيرهم قبل صغيرهم .. وانا وانا وانا ..)) التفت اشوف ورا .. إلا والقاعة امتلت إلى راسها واللي ما كانش قد جاء وصل ...

    اللي فاته المشاهد الاولة .. يجي هانا وانا اقله كيف قد الوضع في القاعة ..

    الكراسي مقسومة نصين .. يمين ويسار .. اخوكم هرب من صاحب الشمة من اليمين .. إلى يمين اليسار .. ((اللي ما افتهم لهم عيقولوا ايش هذا الاسهاب الممل ))

    في اقصى اليسار كان فيه عشرطعشر بنت # (( شوفوا التحيز ضد المرأة .. دايما يخلوا المرأة في أقصى اليسار كانهن من اصحاب الشمال والرجال هم أصحاب اليمين ))

    وفي الكراسي الامامية خليط بين ناس مثلي .. جالسين مثل يوم الثلوث في الاسبوع - ماله اي داعي ..اشوف جرب وعد ايام الاسبوع بدون الثلوث صدقني عتمشي معك - وناس بالكرفته والهندام .. تحس أنه مدير عام .. والزلط #باينه عليه

    وفي الخلف *يعني من بعد الصف الثاني * أعضاء المجلس .. ويا عيني عليهم

    ذي يزن هو وشلته تأخروا بيحشوا السلاح في الشاص .. دخلوا والعيسائي بيتكلم .. وكلهم بين ايديهم حبحب وظلوا واقفين في الاخير بياكلوا حبحب ويسمعوا .. سمعت سهم تعز سلم على الحاشدي وقله من اشتريت الحبحب .. قاله الحاشدي إن المدوفر خارج بيبيع حبحب .. راح سهم فارح في المدوفر يبهذل به .. رجع و الحاشدي بيضحك .. خخخ ضحك عليه ..

    البحار قام يسلم على الشلة ومعه الفوضوي ومشاكس .. وهو مهندم ((مثل ما هو في الصورة اللي تحت معرفة الان)) والفوضوي والمشاكس بالمعاوز عاملين مثل البودي قارد .. و معاهم الحمادي بنظارة سوداء .. لو تشوفه نانسي لا تطلب ايده من عمو أبو الحمادي للجواز *_*...

    وورايا تماما جاء اركان حرب و المحتار والمهذب# قفشوا ابن كريتر ومعه واحد .. الله يصيبك يا ابن كريتر .. اين اديت شعرك .. جلست تضحك علينا بالصورة هذك وشكلك قدو خرفه .. طلع الذي معه نجم كريتر .. هذا استلمه البحار :

    هذا انت يا نجم .. وانا اقول ليش جلست اربع سنين تبحث عن صورة لمعرفك .. إلا وانت تشتي تهرب من صورتك .. مكنتناا مبدع .. ابداعاتي.. أعمالي الادبية ولو احنا داريين انك هكذا كنا نقلناك منتديات المفجعين العرب .....

    وانتوا تعرفو الاعضاء .. إذا حد زبج الباقيين جوزوا# له .. وتجمهروا على نجم وهو مسكين هو واصحابه (صهاريج عدن , ومطر المعلا , وساحل البقره #) كلهم لابسين مليح .. مثل الجاهل رايح يصلي عيد ...


    البنات جالسات على يساري بيننا وبينهن ثلاثة أعمدة كراسي فاضية (( الجدار العازل)) وجالسات يضحكين ويحشين في الاعضاء .. وانا كلما اشتي اشوف صليهن لانا عد اخمن عضوة والا عضوتين .. تقفز لي صورة محسنة بعيونها و نصف قُطر العين الواحدة خمسة سنتيمتر وتقرا لي <<قل للمؤمنين يغضوا من أبصارهم >> عاد إلا ارزع راسي ورا وانا مؤدب .. وكما قال المثل ((خليك على علي صالح اللي يعرفنا ونعرفه))


    الاعضاء اندمجوا بسرعة مع بعض كانهم يتعارفوا من زماااااااان ((أنا غبي أحيانا .. ما لاحظت انهم فعلا متعارفين من زمان ))... وانا بين اراقبهم من بعيد ما اسمع من شقي إلا صوت بناتي بيقرح :


    هيا أقلب وجهك وورينا كم عرض اكتافك ... قال يشتي تعارف أخوي قال ... قد إحنا اخوة في المنتدى مش هانا يا ظنى أمك


    العضو اللي انصرع .. مسكين ما عد لقي أرض تشيله ... (( انا ما عرفت ايش معرفه .. حد عرف منهو يا جماعة )) هو كانت نيته طيبه .. مسكين :(

    القفشات كثييييير .. واعضاء كثير تعارفوا بيناتهم .. وانا ما انتبهت على كل الناس اللي تعارفوا ... والجماعة اللي جالسين يتفرجوا من جيزي# .. واحد من اثنين .. يا عضو وجالس يتفرج وساكت ما يشتي حد يعرف منهو .. يا واحد ما هو فاهم ايش بيحصل ... وجالس مثل الاطرش في الزفة .. وهولاء باين عليهم جايين ناويين يشتروا المجلس موجهين من ناس ..


    والاعضاء بعد ما شافوا الاستمارة .. جلسوهم البحار وذي يزن وجلسوا يتشاوروا فيما بيناتهم في مصير المجلس .. اللي يقول ننشق ونعمل لنا مجلس .. واللي يقول حرام ما ينباع ((على طول تلاقي الجماعة الحاميين في كل مضرابة )) ... واللي يقول واذا انباع .. قد احنا نتعارف هكذا طبيعي

    في الاخير .. قال ذي يزن ويده على القايش ... خلونا نشوف أول شي من عيشتري المجلس .. وبعدين لك جمل جمال .. ولكل زمن مقال ... عجبني شكله وهو بيدي حكم .. يشبه سيف بن ذي يزن الصدقي ..

    مشت حوالي النص ساعة ... جو ناس يجمعوا الاستمارات .. وقام واحد مسك المكرفون

    قال أنهم أعضاء المجلس وأعدوا لنا برنامج مفاجأة .. الاعضاء اللي مجتمعين بالخلف كلهم مستغربين وعلى وجوههم تعبير (( ما بيخرط هذا احنا الاعضاء ولا احنا داريين ما بيعمل))

    بدأ البرنامج ... يعني مشهد خامس


    _______________________________________


    # وقال وهو بيشقص واحد ورا(كأنوا بيقله : هاه كيف انا :cool: ) ..... طلع بيشقص ذي يزن بيرويه أنه أذا وعد وفى


    # عشرطعشر بنت ... بضعة عشرة بنت

    # زلط .... فلوس ,بيس , نقود .. مال


    #المحتار والمهذب ... أعضاء جدد .. ركزوا ملي

    # زبج ... يعني نكّت

    # جوزوا له ... يعني سايروه وشجعوه

    # صهاريج عدن , ومطر المعلا , وساحل البقره .... برضة أعضاء جدد :rolleyes:




    إن شاء الله المرة الجاية أجيب لكم آخر الموضوع .. ووالله لو بيدي اكمله الان .. بس بتمتط الحكاية .. خلو لنا لقاء ثاني عشان اللي عجبهم الخبر يستمتعوا أكثر.....واللي ما عجبه أكيد إنه ما واصل القراية إلى هانا :p وكونوا اعذروني اذا غلطت .. اول مرة اكتب وما عملت مسودة .. .. فالمعذرة :)




    المشهد الخامس والأخــــيــــر


    أيها الحضور الكريم .. السادة الاعضاء وعضوات مجلسنا العزيز .. ضيوف مزاد نقل ملكية المجلس اليمني نرسل لكم تحية عطرة عبر أثير المودة للعقول النيرة .. تحية بعبق البن اليمني الاصيل .. تحية ...((لا لا .. مش نقل مباشر للحفل بس المقدم بدأ بداية جامدة من النوع اللي تتوقع بعد المقدمة يرحب بفخامة الاخ المشير الرمز حفظه الله ))


    منهو هذا ؟؟ , ما لهم ما يدوا سماعات مثل الجن هولا يكسرين الراس , يا همتاه ايحين عيكمل المزاد هذا نشتي نلحق القات , تقل بكم عيبيعوا المجلس ؟؟
    هذه جمل تسمعها من الحضور الكريم يهدروا كرد على الترحيب الموجه لهم

    والا الشيبة الذي دخل القاعة مع الداخلين .. جاء يسألني يا بني كمو متر المجلس ذا يقولون عليه ... جاوبته اكبر من ديوان الشيخ يا حج ...

    ما اطولش عليكم المقدم كلامه فصيح من النوع الذي حين يسمعة زميلي السيرلانكي يقول صدق الله العظيم #

    قدم لكلمة لوكيل وزارة الثقافة والشباب .. أنا عادة ما انتبه لكلام الكبار لانه زي بعضه .. كانه يحفظوه قبل ما يتعينوا .. ((مش مقتنع اجيب لك خطاب للسلال بعد الثورة واخر خطاب للرئيس واتحداك تعرف اين كتب قبل الثاني )) مختصر الكلام أنه المجلس يعتبر رمز من رموز حرية التعبير في ظل سياسة الانفتاح التي يرعاها الرئيس الصالح حفظه الله ... و ... و ...

    انا مخيلتي تشاغب في مثل هذه المواضع .. تخيلت الوكيل وهو يحاول يغطي راسه والحضور بيراجموه بالصحات وقشر الحبحب .. وقماقم الفول اللي بيشربو فيها شاهي .. و ..

    وتقديراً من الوزارة لأهمية هذا الصرح أعلن دخول وزارة الثقافة بالمزاد لضمه إلى سلسلة المنابر الاعلامية تحت رعاية الحكومة ..

    بدأت موجة ضحكة ساخرة من الخلف لثواني قطعت بسرعة ... الظاهر انتبهوا إن الحكومة ما بش معاها صفاط ..

    نزل الوكيل .. ولاحظت القلق الذي ساد على الجماعة الاعضاء .. يعني الحكومة إذا دخلت في مضرابة أكيد القبيلي يخرج مقتول ومتهم .. لكنهم لزموا الصمت ... على مقولة .. يا خبر اليوم بفلوس بكرة يبقى بشوية زعقة #

    بعد الوكيل قدم المقدم لعضو مجلس النواب المستضاف مؤخراً بالمجلس وناشر فضيحة الفساد الشهيرة المستأصلة بوزارة الثروة السمكية ..
    إختصار ما قال بعد ما أبدى أعجابة بفكر الاعضاء الراقي والذي لاحظ رقيه من خلال إستضافتة بالمجلس : أنه ينصح بأن يبقى المجلس مستقلاً وأن لا يدرج تحت جهة رسمية ليحافظ على صدارته ورونقه

    هنا قام الاخ الذي عرض علي شمه قبل قليل وصاح بصوت يخليك تحمد الله على نعمة العقل .. أيوه يا إصلاحيين تشتو تخلوه مركز للمغرضين .. والطاعنين للوطن ومعقل تنشروا فكركم الارهابي الوصولي الشمولي الوصولي الامبريالي (( ايه الكلام الكبير ده))

    الناس اتسغربت .. هذا الكلام يخرج من صاحب هذه الصماطة # جو الأعفاط اللي فتشونا عند الباب شقلوه مثل الدجاجة وهو بيذكرنا إن أنكر الاصوات صوت الحمير مش صوته ..

    بعد ما أكد النائب أن الاصلاح مش ناوي أصلا يشتري المجلس قام المقدم وأكد أن القرار راجع لمالكي المجلس .. وندد بالاشكال الغير حضارية للتعبير عن الرأي ((تقولوا كان يقصد الامن السياسي)) وقرأ بيتين شعر وقال .. فتأملوا ... *منهو هذا ;) *

    قدم لشاعر أدى قصيدة سلبت لب الحاضرين وصف الشاعر فيها أيامه في المجلس خلى كل عضو يحس إن هذه الابيات من تأليفه .. صفقنا له من قلوبنا وكان نفسي وانا المنصور احفظ القصيدة من أول مرة انقلها لكم هانا عشان تسمعوها عفواً قصدي تقرأوها

    رجع المقدم : تسمعون الآن نبض أعضاء المجلس اليمني .. عضو لم يرض أن نقدمه باسمه دون معرفه كما فضل معظم الاعضاء الموجودين .. عضو عُرف في كل زوايا المجلس .. ومر بجميع مراحل المجلس حتى يومنا هذا .. نقدمه كما يسميه الاعضاء .. الملك .. او الكنج ســــعــــــدووون

    التصفيق طغى في القاعة.. وطلع رجل تعرف أنه يمني من بعد اميال .. الصلع زحف على رأسه رشيق له وجه من النوع اللي تحبه أول ما تشوفه .. لبساطته ..

    السلام عليكم ورحمة الله وبركاتة .. أو كما يحبها قلبي ... سلمون يا قبايل

    رجع التصفيق والتصفير مرة ثانية .. وتسمع جمل من صلى البنات

    فززززززيع .. ويا حليله # .. يووووو جبره .... ربي يسعدك يا سعدون ...

    ((اصحاب التعارف تبادلوا نظرات .. كانهم اكتشفوا حاجة ))



    المهم كلمة الكنج موتتنا ضحك .. وهانا عرفت نسبة الاعضاء بين الحضور .. لان في جماعة كانوا جالسين ولا عارفين ايش حصل من يوم ما طلع سعدون .. وعلى فكرة في ناس كثيير أكيد اعضاء عشان بان من إندماجهم مع الكنج سعدون بس ما عرّفوا عن معرفاتهم



    تمنيت أنقل لكم كلمة سعدون .. بس كلام سعدون اذا ما قاله او كتبه بنفسه .. تروح نكهته


    ختم سعدون ... وسنعود يا قبايل ... لنتقابل على صفحات مجلسنا الحبيب

    نزل على تصفيق حار وجماعة التسلية اللي ورا قاموا قد كانو يشتو يقدموا ياكلوه .. الظاهر اول مرة يعرفوه شخصيا .. لكنه رجع مقعده بالامام ..

    وعلى طول خرج العيسائي هو وسبعة انفار من غرفة في يمين مقدمة القاعة .. واحد منهم بيده الاستمارات .. طلع على الطاولة .. والباقي رجعوا مقاعدهم بالامام


    قامت إدارة المجلس بدراسة العروض المقدمة ودراسة نقطة مستقبل المجلس التي شرحت بالعروض ومع أن بعض الاستمارات لم تملأ بالشكل المطلوب ..

    فالبعض عرض علينا شراء مجلس الشعر الشعبي على حده .. وهنا عروض مشابهه لشراء الاسلامي والسياسي والتعارف والتسلية وستتم استبعاد هذه العروض

    كما أن البعض ملأ الاستمارة كلمات تعبر عن رأيه من هذا المزاد *وعمل بوجهه تعبير يقلنا إنهم كتبوا كلام مش تمام* والبعض ارسل تهديدات ... لا نحب أن نعكر أمزجتكم بمحواها


    وقد كان القاسم المشترك ان معظم الاستمارات لم تحدد سعرا أدنا الذي طلب منهم للمجلس

    وسنبدأ المزاد بعرض .. زملاء ماليزيا القدامى .. وهو عرض طلابي لمس مشاعرنا ونحييهم تحية إخاء ومحبة لحرصهم على مستقبل المجلس فلنحييهم .. *بدأ يصفق واحنا صفقنا بعده* إلا جماعة ما صفقوش يا سعم يقلولنا هذا احنا اللي بتصفقوا لنا

    جمع طلاب ماليزيا ................................. 15000 دولاراً وسنبدأ المزاد بهذا الرقم ((اللي يشتي يحول لليمني الصرف : قد الدولار ب 274 ريال ))


    قام واحد عليه إمارات المشيخة .. الاستمارة 75 ............. 20000 دولار

    قلب الرجال بين الاستمارات لوما وصل للاستمارة تبع الشيخ رقم 75.. وقرأ من الاستمارة

    عضو المؤتمر الشعبي العام الاستاذ حسين قاسم المهلي................................. 20000 دولار

    الاعصاب مشدووووووووودة يا جماعة .. والسكون عم القاعة ... وتعليقي هانا يوصف بالفضاعة


    ابن كريتر قام .. الاستمارة 43 ............................ 220000دولار

    رجع صاحبنا مثل الصدى

    اتحاد الطلبة اليمنيين بسويسرا .......................... 22000 دولار

    قام ثالث ... الاستمارة 25 ............................... 25000 دولار

    واللي على المكرفون

    عضو من نجوم مجلس الشعر الشعبي بمعرفه برج الرياض رضوان عبدالكريم..........25000دولار


    وكيل الوزارة قام ........................ وقرحها 30000 دولار


    هنا رد الادارة بأدب .. أن الادارة ناقشت عرضكم وفضلت أن يبقى المجلس مستقلا احتراما لرأي أغلبية أعضاء المجلس .. فابتسم الوكيل ابتسامة ما تطمنش واكد احترامة لرغبة الاعضاء وان المجلس يعتبر ملكية شخصية .. يحق لمالكة بيعة لمن يريد .. وقد وضحتم هذا عند وضعكم لشروط المزاد


    هنا قام عضو .. الاستمارة 94 .............................. 30000 دولار

    المعلق : عضو من رموز المجلس السياسي ... حسين على السنحاني بمعرفه المحنك.......................30000دولار


    سكنت القاعة لولهة .. وبصراحة انا ما كنت متطمن لصاحب اكبر مبلغ .. واظن شعوري كان نفس شعور بقية الاعضاء اللي عرفتهم

    هنا قام واحد صعب تخمن كم عمره لانه لابس كرفته ونظارة سوداء وحالق لحيته مع شنبه .. وسامة فرص

    ... الاستمارة رقم 19 ............ 33650 دولار

    خخخخخ يعني كان بيقل للناس انه داخل بكل اللي معه

    المعلق عضو عزيز من مجلس التعارف .. بشير حمود ناصر بمعرفه الحبيب جاثوم................ 33650

    هانا قام السنحاني قومة *يا بها يا عليها *وقال واستمارة 94 .................. 35000 دولار


    المعلق ... من سيضرب الرقم .. هل هناك من يعلو عن 35000 دولار .. بيني وبينكم وقفة السنحاني كانت جامدة .. وباين انه لو حد زود .. السنحاني عيرفع

    رفع المعلق الجلسة ... لمناقشة النتيجة مع الادارة ...

    وعم الصج والرج ((مدري ايش بيرجوا ... كلمة وكتبتها وما عد امسحها))


    بصراحة ما كانش فيه داعي اكتب لكم الان بس عشان تحسوا ان الادارة تناقشوا بس .. اعصاب الاعضاء كانت تعبانه ولا حد ارتاح للسنحاني و اصحاب التعارف كلهم التموا على جاثوم ... وجاثوم كان متحفظ معاهم قوي ... مدري ليش


    بدون لعب بالاعصاب .. العيسائي رجع .. اعتذر للسنحاني .. لانه رأى إن ملكية المجلس من الانسب أن تنتقل لجاثوم ... واعتذر للكل عن اظطراره لبيع المجلس ... وبلغنا سلام صديقه ابن عباد والذي لم يستطع حضور المزاد .. واخبرنا أن الفكرة راودته لاول مرة بسبب موضوع لابن عباد # رعاه الله


    الاعضاء ما عد سمعوا لبقية كلام العيسائي .. جاثوم طلع يكمل العقد .. ويستلم معلومات المجلس عشان يغيرها .. ودفع الفلوس كاااااش ... وانفض المزاد .. وجاثوم على خرجته حاولوا كل اعضاء التعارف يعزموه لكنه أبى ... وكان متحفظ جداً .. خصوصا مع أعضاء معينيين كان قريب منهم

    ********************************************************************


    رجعت البيت ... بعد العصر دخلت النت .. المجلس مغلق .. بعد المغرب مغلق

    بعد العشاء لوما سارت محسنة تسوي العشاء ... ولعت حبة شقارة (( الله يقطع ابوها ما بدأت ادخن الا بعد الجرعة الاخيرة من حكومتنا المجيدة)) وفتحت المجلس .. فتح معي المجلس

    رجعت روحي وانا اشوف الاقسام مفتوحة

    دخلت العام إلا وفيه موضوعين مثبتين ....

    الموضوع الاول .... انتخابات مشرفي مجالس المجلس اليمني من 15/10/2010 إلى 15/11/2010
    كاتب الموضوع كان مرشح اسماء لكل مجلس ... وفاتح باب التصويت .. قائلا بان باب الترشيح مغلق على من يستحق.. وكانوا المرشحين خليط بين الاعضاء الجدد وبعض المشرفين القدامى .. أما باقي المشرفين والاداريين القدامى فقد ذكروا في موضوع ثاني مثبت ...

    وكان فيه نسخة من هذا الموضوع في كل مجلس


    والموضوع الثاني

    كان معمول فيه باند لفترات تتراوح بين الاسبوعين والشهرين .. لعدد من المشرفين والاداريين القدامى بسبب مواقفهم المتشدده ضد الاراء المعارضة لسياسة المجلس

    الموضوع كان مختوم بــ


    تمام :


    وكان الموضوع باسم المنسي

    وبدأ المنسي الموضوع .. بشكر لجاثوم اللي سمح له بتقمص معرفه ... وشكر لأيسر .. من قام بتقمص معرف جاثوم .. وشراء المجلس باسمه .. ومن ثم بيعه للمنسي.. وأعلن المنسي أنه المالك الشخصي للمجلس هو وثلاثة أشخاص .. لن يظهروا على الصورة .. وشَكَرَ الله بأن خبزنا عادوا في ديمتنا.........


    _______________________________________________



    # حين يسمعة زميلي السيرلانكي يقول صدق الله العظيم ...... مساكين المسلمين اللي لغتهم عجمية .. مرة كنا في المطعم وصاحب يمني قهرني قلت له انت إبن أبي ابن سلول .. رد السيرلانكي : يس يس رضي الله عنه :

    # زعقة ... فصفص .. لب .. قرع .. هو عبارة عن شئ مكره المدرسين في مهنة التدريس ... ومشمت لنا بنظافة مدن اليمن

    # الصماطة .... الشال .. الغترة .. قد كانت مثل لوحة تشكيلية من حق الفنانين المجانيين اللي بتفوز بجوايز

    # يا حليلة .... كلمة يستخدمها الاعضاء ليفهمونا إنهم يتكلموا خليجي .. أو لانهم يتصفحو منتديات خليجية كثير .. وما ناش عارف معناها بصراحة


    #الفكرة راودته لاول مرة بسبب موضوع لابن عباد ....... فعلا فكرة الموضوع أتتني بعد دخولي لموضوع بن عباد .. رقم مميز للبيع .. فأشكره .. واقله .. إني بحبه


     
  2.   مشاركة رقم : 2    ‏2007-03-10
  3. عبدالله جسار

    عبدالله جسار أسير الشوق مشرف سابق

    التسجيل :
    ‏2006-02-09
    المشاركات:
    33,818
    الإعجاب :
    202
    اللقب الاضافي:
    نجم المجلس اليمني 2006
    الحبيب أمير السلام لله درك ما أجملك ..
    تركت كل ما بيدي وتسمرت عيناي أمام قصتك :)

    وليت أن صورتي بالبندق قريبه فأهديكها لترى كيف أنه لائق علي :D
    ولكنها باليمن !!
    ..............
    أسلوب جميل ورائع وسرد موفق لا يمل
    وسننتظر بشوق تكملة قصتك وليت أنك لا تتأخر علينا ..

    ولك على الدوام
    محبة الأسير واشتياقه ​
     
  4.   مشاركة رقم : 3    ‏2007-03-10
  5. amer alsalam

    amer alsalam قلم فضي

    التسجيل :
    ‏2005-07-26
    المشاركات:
    3,934
    الإعجاب :
    0

    شجعت نحنا واحرجهنتني يا أسير :) وبيني وبينك ولا حد يدري

    كنت ناوي اقضي الليلة أتابع افلام .. عشان عطلة

    رحت لجاري اتسلبط عليه يدي لي افلام .. لقيته مش موجود

    عاد الا رجعت اهبش هانا ... وصورتك بالبندق .. أنا واثق ;) قد حلمتك بتتنصع
     
  6.   مشاركة رقم : 4    ‏2007-03-10
  7. الأمـيـرة

    الأمـيـرة قلم ذهبي

    التسجيل :
    ‏2005-08-15
    المشاركات:
    5,220
    الإعجاب :
    0
    فعلا لايحضرني كلام يوصف روعة ماكتبته:eek:

    موضوع والله رهيب جدا وبجد اندمجت جدا في الموضوع و كأني اعيش الحدث ولاابالغ ان قلت اني حسيت بالحزن خاصه وانت توصف حال المجلس وكل اقسامه مغلقه والناس تتوادع:(

    ماشاء الله عليك ابدعت و تألقت:)

    مشكور و جوزيت خيرا
     
  8.   مشاركة رقم : 5    ‏2007-03-10
  9. amer alsalam

    amer alsalam قلم فضي

    التسجيل :
    ‏2005-07-26
    المشاركات:
    3,934
    الإعجاب :
    0


    ربنا يبارك فيك .. يا أميرة يا بنت الأمرا


    الموضوع كتبتة بالعامية ومباشرة من الفؤاد إلى صفحة إضافة موضوع جديد .. فيمكن أتى تلاقائي وانا طارح يدي على راسي مراعي للنقاد يعلمونا .. عشان نستفيد بدورنا

    وربنا يجازيك الجنة .. :)
     
  10.   مشاركة رقم : 6    ‏2007-03-10
  11. jathom

    jathom قلم ماسي

    التسجيل :
    ‏2006-06-22
    المشاركات:
    12,498
    الإعجاب :
    0
    يا شيخ حرام عليك أنا مندمج وفي الأخير تقلي التكملة مدري في أي قرن ....

    عموماً يا سيدي موضوع 10\10 وأحلى ما فيه السرد بالعامية بصراحة تميزت في أسلوب السرد وسلاسته أيضاً الحاجة الملفته للنظر الجمل الإعتراضية بين الأقواس .. يعني بالمختصر صاحب الموضوع كاتب ساخر من الطراز الأول ...

    مشكور على الموضوع وبانتظار التكملة ..
     
  12.   مشاركة رقم : 7    ‏2007-03-10
  13. البحار

    البحار قلم ماسي

    التسجيل :
    ‏2002-12-22
    المشاركات:
    19,341
    الإعجاب :
    17
    الغالي امير السلام هو بزاتو ما في غيرو(انقلبت سوداني مثل فرفر:))

    و الله عجيبه

    كل ذا منك يا شيخ ...قصة روعة

    و لــــــــــــــــــكــــــــــــــــن



    ولا اقول لك ما لكنش لانه لكن تفتح لي بعض الاماكن اللي تمكني من ان اتمسكن حتى اتمكن :)





    خلينا في المشاهد لا عد ازيد افجعك :D


    المشهد الاول ولا اروع و خاصة السطل اللي توقف به المنبه هههههههه فكرة حلوه
    ولا اسم زوجة المستقبل (محسنة) مش عارف ليش احس ان شكلك شحات :rolleyes:

    المشهد الثاني لججت وخاصة وصفك للبسكوت الماري اللي يدلعوه ويقولو له تميز مش تميس
    ممكن تتدلعوها عندكم بالبلاد

    المشهد الثالث رهيب للغاية وخاصة وصفك للقطاع و البرميل والشيخ ذي يزن ولا وصفك للامن السياسي ههههههههههه قوية
    لو كنت زيدت له في القصة (استنظف الله لا يسيئك)


    بس اول مرة ينضحك عليا (هو كل مرة ينضحك عليا)

    و احسب انك بتكمل القصة


    حاااااااااااسب تقول انني عديتك ;)


    جميييييييييييييل


    هذا عضو سجل في 2009:cool:
     
  14.   مشاركة رقم : 8    ‏2007-03-10
  15. amer alsalam

    amer alsalam قلم فضي

    التسجيل :
    ‏2005-07-26
    المشاركات:
    3,934
    الإعجاب :
    0


    يا عيني على المرور .. وعلى فكرة القصة بابطالها جهزتها في راسي في البداية .. وكنت ناوي احطها كاملة ... بس لقيت أنه فعلا القصة طولت .. فخفت حد يدخل يهزئني ... والله لا يرويك شماتة في التعارف والتسلية .. إذا دخل واحد يشندف *راجع القاموس:p * دخلوا بعده بقية الشلة يدعموه .. :)

    باذن الله قريبا جدا اكتب البقية .. وفي نفس الموضوع .. :)

    لانه ما يهونش علينا جاثوم ينتظر
     
  16.   مشاركة رقم : 9    ‏2007-03-10
  17. amer alsalam

    amer alsalam قلم فضي

    التسجيل :
    ‏2005-07-26
    المشاركات:
    3,934
    الإعجاب :
    0
    هههههههه .. ما كانش لها داعي لكن وبناتها .. أول ما شفتها قلت البحار اذا هزئني حرام وطباق ما ازيد اكتب ... لكن طلعت من بنات حركاتك


    و لا تكنش تصدق تميس وماري ... احنا تميزنا القرم .. والماري حقنا الذمول

    على فكرة عجبتنا وانت تتكلم سوداني .. بس زي فرفر ما فيش .. العرق حساس :D الله يستر لا تسمعنا
    بس لاشتباه اللفظ بين تميز .. و تميّز ... خخخخ والكلام بلهجة عامة عشان نقرب القراء من اجواء القصة



    وللدعاية لبقية الموضوع ....... جوهر الموضوع وثقيله في الجزء الجاي :D
     
  18.   مشاركة رقم : 10    ‏2007-03-11
  19. ذيب الخلا

    ذيب الخلا قلم فضي

    التسجيل :
    ‏2006-09-19
    المشاركات:
    4,592
    الإعجاب :
    0
    حلوه حلوه حلوه قوي يا امير :)
    والصراحة اننا دخلت فضول اشوف ايش مكتوب هنا بس معاد قدرت اطلع الا لمن خلصت ;)
    بلا اعذار ولا زم تكمل المزاد والا سطل الماء بيكون برميل وانت عارف الباقي وربنا يوفق محسن ومحسنة :confused: :p
     

مشاركة هذه الصفحة