مساجلة شعرية بين الشاعر محسن الخياط السماوي والشاعر ابو رضا السماوي

الكاتب : فيــ الدعيس ـصل   المشاهدات : 1,330   الردود : 10    ‏2005-08-24
      مشاركة رقم : 1    ‏2005-08-24
  1. فيــ الدعيس ـصل

    فيــ الدعيس ـصل عضو

    التسجيل :
    ‏2005-08-23
    المشاركات:
    11
    الإعجاب :
    0
    مساجلة شعرية بين الشاعر محسن الخياط السماوي والشاعر ابو رضا السماوي

    ـــــــــــــــــــــــــــــــــــــــــــــــــــــــ

    البداية للشاعر الخياط ( نخوة عشاير)

    روحي اتواخذت يالماتحن الهه

    مثل عودة زرع راﭽـبهه منجلهه

    * * *

    رﭽـبهة المنجل وحاصود لاويها

    والف عونة حصاد اتهوس اعليها

    تكولب مال حاضر صبخة حريها

    وغدة ايضيع الفرس ريعان عاذلها

    * * *

    عاذلها تنيح والزم السكان

    وانا برجلية رحة وناحرت موحان

    تاركني الوكت والصبر واحضيضان

    وكل ربعي هذيج الجنت اجاملها

    * * *

    اجاملها جنت ومكرم ومعزوز

    واكرم بالعزيزة ابغير ﭽـيل وروز

    تاليهه حمه اﭽـويريدهه ابتموز

    ثـﮔـبت والربيع ولا يلحجلهه

    * * *

    اشيلحجلهه وسهم باجيهه صم ارماد

    ثالث دخل بيهه وصار بيهه اعناد

    حشمت العطاوة وعبس وآل زياد

    والبركات والصفران رحتلهه



    * * *



    رحتلهه ورحت مثل المضيع نوﮒ

    عدكم يال غانم يشتكي المبيوﮒ

    عدكم من عـﮔـب ما روح لال صفوﮒ

    يالزرﮔـان عدكم عيني اوشلهه

    * * *

    اوشلهه واماطل بالكعد تغريب

    اوّجي اعله الخزاعل انشد اعله الطيب

    شتسوي الغزاله التوهه تبغي اتجيب

    والـﭽـيله اجتهه ابحد مفاصلهه

    * * *

    ابمفاصلهه الـﭽـيله وشامت النووج

    تعكز للظوالم ياخبر وادرج

    انه ابليل وابهيمه ورمل وبعج

    ﭽـملهه الولاني وذيب حطلهه

    * * *

    ﭽـملهه الولاني وخله بيه الصوچ

    اغزل بالمصايب والقصيدة اتحوچ

    ياروحي العزيزة ابيا عطش ذبوچ

    محلت والسواجي انـﮔـطع منهلهه

    * * *

    منهلهه انـﮔـطع والعمر ظل معطوش

    مريت ابجماعه وعرف لال حنوش

    ﮔـلتلهم اصير ابرايكم يرفوش

    بس كون اليحـﮔـني العله يندلهه

    * * *

    يندلهه ويشخص ضيمهه ابيا حال

    انه الذبه الوكت والذبه وكته اشـﮔـال

    ياطين الغميج الدافرة الخيال

    وينك يابو طلبه الـﮔـاع بدلهه

    * * *

    بدلهه ابشر يعه الموت بيهه ايحل

    دفرت والفرس تتمحلج وتصهل

    مخنوﮔـه ورسنهه اجداد جلد الصل

    الـكـدهه اعله كيفي وخايف اكـتلهه

    * * *

    اكتلهه واخليهه ابسرجهه اتموت

    واحذر خاف يشتمني العليهه ايفوت

    رايح لال بلحه ومعتني وبسكوت

    بلـﭽـي العارف العدهم يحجملهه

    * * *

    يحجملهه وينزعها السرج ياحيف

    مخصوصه وحذاهه من حديد السيف

    ﭽـا شنهي وشجاهه اتبرهجت بالصيف

    لااﮔـدر اروح ولا اردلهه

    * * *

    اردلهه واناخي ويا عساهه اتعيش

    الف اشماغي الازرﮒ وامر بال احويش

    وانـﮔـز مثل نـﮔـزة حرمل الدرويش

    والفازع لروحي ابحزن ﭽـملهه

    * * *

    ﭽـملهه ابحزن واتلهوجت بوجاغ

    واصعد للجوابر وارد للصياغ

    وارد انذر نذر مرياح بيه ادراغ

    للينطي امرادي وقصتي ايفلهه

    * * *

    ايفلهه ويشوف اشلون وكتي اوياه

    عثروا بالمتيهه واليدور تاه

    يانخل البديري اتمايلت ويلاه

    وين ابن الحلال اوياي يعدلهه

    * * *

    يعدلهه وهي درجه اعله خورة ماي

    صعبه اعله النشيط اسهلهه من بلواي

    حطني يامضيف اولاد عجه ابراي

    اصعد عالحداجه لو احّملهه

    * * *

    احمّلهه وهي حرة ودربهه ابعيد

    ﭽـنه الفرج ينفذ وشيسوي الحيد

    ﮔـلي ابياكتر عاشور ودة العيد

    دنيانه انتهت ماتت هلاهلهه

    * * *

    دنيانه انتهت والعمر مل وبات

    وارم كتر مني ولاخر مات

    يطارش تعتني لاولاد ابو ﭽـفات

    يغبش للسماوه وخل يطبلهه

    * * *

    يطبلهه ويخلي اجنازتي اعله الراﮒ

    عالشط والصبح واﮔـبال عجد الطاﮒ

    جيبولي هذاك العافني اعله افراﮒ

    يوﮔـف عالـﭽـنازه وخل ينـﮔـطلهه

    * * *

    ينـﮔـطلهه وبعد يتواله بالنـﮔـاط

    هسه انه اويه ملـچ الموت عندي ازماط

    انه البالسوالف ما تلحـﮔـه انشاط

    ﭽـذابه الـﭽـنازه وخل يعطلهه

    * * *

    يعطلهه الظلام الهودر ومختط

    وعزراييل مني ايأيس ويفحط

    اﮔوم امن الـﭽـفن واشبـﮒ عليه واشحط

    واﮔله الموتتهه اتـﮔـوم تعدلهه

    * * *

    تعدلهه وترﭽـدهه وترد تنكز

    عطشانه وخطيه العطش بيهه ايحز

    ﭽـن شجرة وسبع تزلام بيهه اتهز

    هابس تنحني الحطابه تسحلهه

    * * *

    تسحلهه وتوﮔـد ارواﮒ يا تنور

    مهرة امعربه وبسرج حبهه اتدور

    ياشرجي السماوة واسمك المشهور

    ﮔـوم اتمكمش العله وتدﮔـلهه

    * * *

    تدﮔـلهه ابعرفتك بلـﭽـن الله اتفوخ

    لاتكشف اثيابي امن الجروح اتدوخ

    ﭽـانت ما امبينه النوب صارت طوخ

    وينه الينزل الـﭽـالي ويغط الهه

    * * *

    يغط الهه ابسنع وايناحر الخوره

    يشاطي حاج يونس روحي منذوره

    واروح انخه الطوايل وره الخافوره

    واﮔـوم اتمكمش العله واحبللهه

    * * *

    احبللهه واشوف اشلون وكتي امنين

    طحت ابير خابط والظلام اثخين

    وصلت للكرار النوب لحس الطين

    ودي اوياك ست ﮔـامات نزلهه

    * * *

    نزلهه اعله وحشه وبيهه اتسله

    يـﮔـوام الخضر ما اندل العله

    خذه ﮔـلـبي العشـﮔـته وفور الدله

    شرب منهه العشـﮔـته اشلون يقبلهه

    * * *

    يقبلهه هذاك البيه ضوة الوهاج

    برديه اشتراله وعاف عظم العاج

    لحد ياثمر بستان ال سراج

    ترة وﮔـفـت احوالي لاتشمللهه

    * * *

    تشمللهه وتلاﮔـت نار كبرة ابآب

    منكم يال توبه نطلب العطاب

    انه ابدهليز زكزاﮒ وحدر سرداب

    والسرداب بيه عظمت مراجلهه

    * * *

    مراجلهه ﭽثيرة اتزود عالمسطاح

    صرنه اشير الاخرس واليسولف راح

    ترة الهدهد تمحّن والهليجي ارتاح

    والهيلـﮒعرف للمايعرفلهه

    * * *

    اليعرفلهه عبر والما يعرف ايهيم

    واشداد الجرح مو اصلي بس ترهيم

    المايـﮔـدر يدفي البردت امن الظيم

    يكرمنه ابسكوته ولا يبللهه

    * * *

    ومن عد هيست جبت العذاره وجيت

    انخه البيه غيره افر ماخليت

    ضم روحه السمع نخواي وسط البيت

    امن اعاجيب وربايع وي طوايلهه

    * * *

    رحت البني زريج وخاطري مكسور

    رديت البني عارض واحشم ابدور

    منهم ايست والـﮔـلب دله ايفور

    شـﭽـاهه الناس محد يرد عايلهه

    * * *

    وكتي العال ماهي العيله من انسان

    رحت اشتـﭽـي البيهم شيخ عالي الشان

    ميران العطيه ونعم من ميران

    ابو موحان كثره الحل مشاكلهه

    * * *

    ﭽـثيره الحشمتهه او امري مو خافي

    ﮔـلهه ايست منهه وﮔـصرت اشفافي

    حـﭽـت وادم قضيتي الفاتك الصافي

    موش اجواد حـﭽـايه ابرسايلهه

    * * *

    ماشفت الفزع من ناس عدهم شان

    ﮔـلـهه الناس ربحت واطلعت خسران

    اطب للسوﮒ ويلاﮔـيني الديان

    تظل بهروش ﮔـلبي اتحش مناﭽـلهه

    * * *

    مناﭽـلهه تحش والدمع تجري العين

    وانخه ابآل عيثم والعويليين

    رايح لآل غزي واﮔـصد الطيبين

    ابدور الناصريه وي مشاعلهه

    * * *

    انخه الناصريه وديرة الغراف

    وي ﮔـرمة بني اعيد والطيبه الاسلاف

    تراني اتبللت من المطر ما خاف

    خلهه الناس من نخواي تبسلهه

    * * *

    انخه الناصريه وكل نواحيهه

    وعشايرهه الاكرام انه اعتني ليهه

    لعد سوﮒ الشيو خ وشطرته البيهه

    العبودة وخفاجه كون اوصلهه

    * * *

    افتريت العشاير رحت لاهل الهور

    اﮔـلهم راح عنبي وباﮔـني الناطور

    غدر بيه الصديچ وعادة المغدور

    اباب الفريضه دمعته ايهلهه

    * * *

    ارد انخه السماوه وبخت ابن طفار

    ورباط البخيت اليشع وجهه انوار

    وبني حـﭽـيم النشامه ويهل دمعي اعبار

    السمعني ايـﮔـول ﭽـاره مايصير الهه

    ********

    ********

    اماالان قصيده للمساجله للشاعر ابو رضا السماوي ردا على قصيدة الشاعر محسن الخياط السماوي



    يمحسن روحك المحد يحن الهه

    رخيصه ومهرتك محد يحجملهه

    ******

    حجملهه انته بيدك واترك العراف

    خل عودك ثمر لايصبح الصفصاف

    طبع النخل يثمر وابد ماينعاف

    ظل اﮔطر عسل عللي تجاملهه

    *****

    تجاملهه وفرض تـﮔـطر عليهه ابطيب

    طبع الشاة ماتعرف نوايه الذيب

    خل ظنّك يصدﮒ ربعك ولتخيب

    عينك عالصدﮒ والـﭽذب وشلهه

    *****

    وشّلهه وﮔطرهه ايروّي صبختهه

    ولاتحزن لمهرك لون شبختهه

    والتتشلبه بحداجاتهه ابختهه

    ولتخلّلي السواﭽـي ايغور منهلهه

    *****

    منهلهه انـﮔطع حتمن تظل معطوش

    واﭽـفوفك كرار البير لامتنوش

    ازرع طيب بيع ابساع من اتحوش

    شراي الولاك وسعر حطلهه

    *****

    حطلهه ويحمّل معتني بالنوﮒ

    خل منه الشليف امن الوسط مشكوﮒ

    انته اعليك بعته وهذا حال السوﮒ

    لترجع العنب والسله بدلهه

    *****

    بدلهه وتراه العنب ما معيوب

    واﮔصد للصفاه جربهم انته النوب

    اﮔصد لال شاهر وادرج المكتوب

    حـﭽـّايه ابتفـﮔـهه ابحزن ﮔللهه

    *****

    ﮔللهه وعليك اتعبر للبركات

    ومن توصل ﭽرفهم تامن امن اتبات

    يصحه الوارم البيك ويرد المات

    ذب اشماغ الازرﮒ من تطبلهه

    *****

    تطبلهه وتعرج بعد للسادة

    ذوله اهل البخت لليطلب امراده

    عين اتصير غطوة وعين الوسادة

    والهه انذر نذر لو قصتك اتفلهه

    * * *

    اتفلهه وسبع تنعام اهل غيره

    قصتك سهله لاﭽن قصتي اﭽبيره

    اذا انته عشت ويه اهلك ابديره

    انه ابديره وهلي ابديره احن الهه

    * * *

    احن الهه السماوه وبس دربهه ابعيد

    حزنك مو مثل حزني مصابي ايزيد

    آنه التيهت عاشور من العيد

    دنياي انتهت دنياك لحجلهه

    * * *

    لحجلهه ودما طل بالكعد تغريب

    بالك بالدحيل الكعد بيك ايغيب

    من توصل شعر راسك تراه ايشيب

    ﭽـالي ومايفيدك من تحبللهه

    * * *

    تحبللهه وتظن جرف الرسيت اعليه

    كعدك ناحر الخوره اشتظن تاليه

    لاينحر وره الخافوره لتخليه

    روحك ﮔـوّه لآل ازياد اسحلهه

    * * *

    اسحلهه وعليك اتعاود وتنشد

    وارشد للعطاوه او بالخبر اﮔـصد

    بارود النشامه ابكل وكت يرعد

    واتجيم العراضه ابحين توصلهه

    * * *

    توصلهه ولكعدك حبلله ابراﮔـه

    اتصيح ابصوت تلكه الزلم تفّاﮔـه

    بس تنخه ابزلمهه وبيهه تتلاﮔـه

    اهل نخوه وترد ابساع عايلهه

    * * *

    عايلهه ترده وعندي بيهه اعلوم

    تاخذ بالمضيف الحـﮒ ﮔبل متـﮔوم

    بس خللي الحـﭽـي ما يطلع ومكتوم

    ماظنّك مضايف رحت تشكي الهه

    * * *

    تشكي الهه ابرسايل وبشعر مسطور

    حـﮒ تصبح حطب والدهر ﭽـالتنور

    مهرك مادفر بالطين ظل ايدور

    عدله الـﮔـاع بس مهرتك بدلهه

    * * *

    بدلهه عربنه اشراف ولد اشراف

    والبركات والصفران عدهه انصاف

    وعبوده وخفاجه ابسانيه وباعراف

    معروفه الظوالم من تطبلهه

    * * *

    تطبلهه وتركز الرايه بالديوان

    ﮔلهم وينكم يسباع عالي الشان

    ولد اﭽياد نعم النسل من شعلان

    وين البيكم اعله الراي يعدلهه

    * * *

    يعدلهه ويرﭽد لوعتي وبلواي

    روحي اتواخذت مابين خورة ماي

    ضاع الجرف ضاع الكعد ضاع الراي

    ياهل الثورة يامعظم مراجلهه

    * * *

    مراجلهه تـﮔـلك ابشر وكر عين

    جرح الضاهدك عنه تنشدك وين

    انته اتمكمش ولا تترك الكترين

    اصبر علتك لمن تدﮔلهه

    * * *

    تدﮔـلهه ابعرفهه ولاتظنهه اتدوخ

    من علتك يمحسن حتمن انته اتفوخ

    لاﭽن جرحك البالطين ظل مليوخ

    هوه اللي يريظهه ويعطلهه

    * * *

    يعطلهه وتعكز واحمل العله

    ماتلـﮔـه الشريعه الموتك اتحله

    حملك لون مال استعجل وعدله

    واﮔصد للطوايل نخوة ﭽملهه

    * * *

    ﭽملهه ابعبس واﮔصد لابن خيون

    وانخه ابآل عيشم وابني معجون

    فزّع بآل توبه وخلهم ايضحكون

    عندك مهرة رايد من يدﮔلهه

    * * *

    ادخيل الوكت منك عفيه من خيّال

    لاجل المهرة دمعك ظل يكت همال

    ما عال الوكت شخصك تدنّه او عال

    عودك محني سهّل امر منجلهه
     
  2.   مشاركة رقم : 2    ‏2005-08-24
  3. مـــــدْرَم

    مـــــدْرَم مشرف سابق

    التسجيل :
    ‏2002-10-02
    المشاركات:
    20,309
    الإعجاب :
    1,589
    حياك يا فيصل
    لكن ترى ويعلم الله إنني ما فهمت كلمه
    لا من البادي ولا من المجاوب [ولكن]
    لله في خلقهٍ شئون
    الحقيقه
    من خلال ما أنزلت ما معي غير اقول
    مقولت عادل إمام

    [[هوا في ناس من ورانا وحنا موش عارفين]]
     
  4.   مشاركة رقم : 3    ‏2005-08-24
  5. ابوعاهد

    ابوعاهد عبدالله حسين السوادي مشرف سابق

    التسجيل :
    ‏2000-11-28
    المشاركات:
    10,212
    الإعجاب :
    15
    يامدرم هذي اللهجة

    لابد سعدون يعرفها


    وياريت من العزيز فيصل ان يشرح لنا

    عن اللهجة هذي اذا تكرم

    ومن اي بلاد ؟؟
     
  6.   مشاركة رقم : 4    ‏2005-08-24
  7. مـــــدْرَم

    مـــــدْرَم مشرف سابق

    التسجيل :
    ‏2002-10-02
    المشاركات:
    20,309
    الإعجاب :
    1,589


    خلاص تحت أمرك يا مشرفنا الغالي
    نشوف الكريم سعدون وربنا يستر
    وحيا الله الأخ فيـ الدعيس ـصل
    وبرضه ممكن يقول لنا من أي بلد الأخ فيصل
    ولهجة اي بلد هذهٍ اللهجه
     
  8.   مشاركة رقم : 5    ‏2005-08-24
  9. أحمد العجي

    أحمد العجي قلم فضي

    التسجيل :
    ‏2002-07-04
    المشاركات:
    4,356
    الإعجاب :
    0
    هذه القصيدة عراقية وهي للشعراء من محافظة السماوة بالعراق الشقيق وهعذه القصيدة يذكر فيها وينتخي بعشائر الناصرية والسماوة من خفاجة والخزاعل والشعلان وال غزي والصفران والبركات للمساعدته يا اعزائي بس المشكلة ان احنا متعودين على قصائدنا الشعبية وهذه القصيدة مفرداتها عراقية بحته والراي الاول والاخير للوالد سعدون حفظه الله يبدي رايه كيف مايريد واحنا معه سوى عوجاء ولا قاديه.

    تحياتي للجميع


    أحمد العجي
     
  10.   مشاركة رقم : 6    ‏2005-08-27
  11. رماد العيون

    رماد العيون قلم ماسي

    التسجيل :
    ‏2004-11-19
    المشاركات:
    44,552
    الإعجاب :
    3
    أظن الأخ أحمد العجي قد أجاب عن تساؤلات الأخوه .. وهذا يظهر من أسماء الشعار

    وليس بغريب عنك يا أبن العجي

    وهذا يدل على أهتمامك بالشعر والشعراء ولما عرف عنك من جمعك للقصائد القديمه

    وكما قال الأخوه معك معك ياسعدون وبعدك عوجا ولا قاديه





    تحية وسلام ..
     
  12.   مشاركة رقم : 7    ‏2005-08-31
  13. أحمد العجي

    أحمد العجي قلم فضي

    التسجيل :
    ‏2002-07-04
    المشاركات:
    4,356
    الإعجاب :
    0
    عزيزي رماد العيون كل الشكر لك على تعقيبك وفي انتظار تعليق الوالد سعدون
     
  14.   مشاركة رقم : 8    ‏2005-08-31
  15. ريدان الأشول

    ريدان الأشول شاعر شعبي

    التسجيل :
    ‏2005-07-21
    المشاركات:
    5,552
    الإعجاب :
    0
    شكر الأخ أحمد العجي

    بس نشتي الترجمه تقدر تترجم
     
  16.   مشاركة رقم : 9    ‏2005-08-31
  17. أحمد العجي

    أحمد العجي قلم فضي

    التسجيل :
    ‏2002-07-04
    المشاركات:
    4,356
    الإعجاب :
    0



    أبشر واشتد عزيزي ريدان ارسل النص الغير مفهوم بالنسبة لك والترجمة فورية وجاهزة على طول وانك على الماسنجر ارسلي ايميلك وتاخذها من مباشرة.

    أحمد العجي
     
  18.   مشاركة رقم : 10    ‏2006-11-12
  19. الشاعر ابو رضا

    الشاعر ابو رضا عضو

    التسجيل :
    ‏2006-11-11
    المشاركات:
    1
    الإعجاب :
    0
    السلام عليكم اخوتنا الاعزاء
    كنت اتصفح بالكوكل على احدى قصائدي وفوجئت بهذا المنتدى الطيب ناقل احدى مساجلاتي الشعرية مع الشاعر محسن الخياط السماوي
    ارحب بكم كثيرا واتمنى لكم التوفيق
    نعم هذه القصيدة هيه باللهجة الشعبية العراقية وفيها الكثير من الكلمات العراقية القديمة وبعض المناطق في مدينة السماوة التي تقع جنوب العراق قرب الحدود السعودية
    وهي قصة جميلة بالنسبة للشاعر محسن الخياط يصور نفسه كأنه متمحن بقضية الدنيا فأجبته على قصيدته
    تحتاج الى مترجم صح ؟ههههههههههههههههههه

    موفقين جميعا
    الشاعر ابو رضا السماوي
     

مشاركة هذه الصفحة